“Kraken” Böyük Britaniya və Avropada “Mastercard” kriptovalyuta kartını təqdim edib

“Kraken” Böyük Britaniya və Avropada “Mastercard” debet kartını istifadəyə verib. İstifadəçilər kart vasitəsilə müxtəlif kriptovalyuta və nağd valyuta balanslarından ödəniş edə bilərlər.

Valyuta.az şirkətə istinadla xəbər verir ki, kartdan “Mastercard”ın qəbul edildiyi onlayn platformalarda və fiziki mağazalarda gündəlik alış-veriş üçün istifadə etmək mümkündür.

İstifadəçilər 600-dən çox dəstəklənən kriptovalyuta və nağd valyuta ilə ödəniş edə bilərlər. Vəsait ödəniş zamanı, demək olar ki, real vaxt rejimində konvertasiya olunur.

“Kraken” kartı həftəlik 2 faizədək keşbek təklif edir. Geri ödəniş “Bitcoin”, avro və ya funt sterlinqlə həyata keçirilir. Kart üzrə əməliyyat və bankomat komissiyası tutulmur.

Məhsul ilkin mərhələdə Böyük Britaniya və Avropa İqtisadi Zonasının istifadəçilərinə təqdim olunur. Şirkət yaxın vaxtlarda digər bazarların da xidmətə əlavə ediləcəyini bildirib.

Böyük Britaniyada “Kraken” kartı “Monavate” tərəfindən buraxılır. Şirkət Maliyyə Davranışına Nəzarət İdarəsi tərəfindən elektron pul fəaliyyəti və ödəniş xidmətlərinin göstərilməsi üçün səlahiyyətləndirilib.

Avropa İqtisadi Zonasında isə kart “UAB Monavate” tərəfindən buraxılır. Şirkətin fəaliyyətinə Litva Bankı tərəfindən icazə verilib.

Kartın təqdimatı “Kraken”in əhatəli maliyyə xidmətləri platforması yaratmaq istiqamətində gördüyü işlərin bir hissəsidir. Şirkət tətbiqini daha fərdiləşdirilmiş funksiyalar və intuitiv interfeyslə yenidən hazırlayır.

Kartın istifadəyə verilməsi “Kraken”in ana şirkəti “Payward”ın “Reap Technologies” şirkətini 600 milyon dollara satın alması ilə eyni vaxta təsadüf edib.

“Reap Technologies” stabilkoin əsaslı kartların və ödəniş infrastrukturunun yaradılması üzrə ixtisaslaşıb. Şirkət ənənəvi maliyyə sistemini rəqəmsal aktivlərlə birləşdirərək qlobal biznes ödənişlərinin həyata keçirilməsinə imkan verən platforma hazırlayıb.

“Kraken”in qlobal istehlakçılar üzrə rəhbəri və “Payward”ın süni intellekt və məlumatlar üzrə baş direktoru Kamo Asatryan bildirib:

“İnsanlar pul xərcləməzdən əvvəl vəsaitlərinin harada saxlanıldığını düşünməməlidirlər. Müştərilərimiz artıq ‘Kraken’ vasitəsilə gəlir əldə edir, pul yığır, sərmayə yatırır və ticarət aparırlar.

‘Kraken’ kartı isə bu siyahıya xərcləmə imkanını əlavə edir və bütün funksiyaları vahid, işlək təcrübədə birləşdirir”.

“Kraken Böyük Britaniya və Avropada ‘Mastercard’ kriptovalyuta debet kartını istifadəyə verir” adlı məqalə ilk dəfə “Electronic Payments International” tərəfindən hazırlanaraq yayımlanıb.