Hava limanında böyük məbləğdə valyuta dəyişməyin – Turizm ekspertindən məsləhətlər

Yay mövsümündə xarici ölkələrə səfər edən azərbaycanlıların sayı artır. Lakin valyuta mübadiləsi və bank kartı ilə ödəniş zamanı edilən bəzi səhvlər əlavə xərclərə səbəb ola bilər. Bəs səyahət zamanı valyuta konvertasiyasına görə artıq xərcdən necə qaçmaq olar?

Turizm eksperti Azər İsmayıl Valyuta.az-a bildirib ki, ilk olaraq səfərdən əvvəl “Google” vasitəsilə cari məzənnəni yoxlamaq faydalıdır. Bu, təklif olunan məzənnənin bazar qiymətindən nə qədər fərqləndiyini qiymətləndirməyə imkan verir. Əgər artıq səfərdəsinizsə, ilk növbədə valyuta mübadiləsi məntəqələrində tətbiq olunan komissiyalara diqqət yetirmək lazımdır:

"Bəzi ölkələrdə valyuta mübadiləsi məntəqələri əlavə komissiya tətbiq edir. Buna görə də valyutanı dəyişməzdən əvvəl əməkdaşdan soruşmaq lazımdır ki, komissiya varmı və təqdim etdiyiniz məbləğin qarşılığında dəqiq nə qədər yerli valyuta alacaqsınız?"

Azər İsmayıl qeyd edib ki, səyahətçilərin ən çox yol verdiyi səhvlərdən biri də hava limanında iri məbləğdə valyuta dəyişmələridir.

"Hava limanlarında məzənnə adətən daha əlverişsiz olur. Bundan əlavə, bəzi mübadilə məntəqələri əlavə komissiya da tətbiq edir. Buna görə də hava limanında yalnız ilk xərclər üçün lazım olan kiçik məbləği dəyişmək, əsas məbləği isə şəhərdə dəyişmək daha məqsədəuyğundur".

Ekspert bildirib ki, avrozonaya səyahət edənlər üçün ən sərfəli variant avro hesabına bağlı bank kartından istifadə etməkdir:

"Əgər ödənişlər avro ilə aparılırsa, avro kartı ilə hesablaşmaq əlavə konvertasiya xərclərinin qarşısını alır".

Onun sözlərinə görə, avrozonaya daxil olmayan ölkələrdə də gündəlik xərcləri bank kartı ilə ödəmək daha məqsədəuyğundur. Nağd pul isə yalnız ehtiyat məqsədilə saxlanılmalıdır:

"Hər ehtimala qarşı ayrıca yerdə təxminən 50 avro və ya ekvivalent məbləğdə nağd vəsait saxlamağı tövsiyə edirəm".

Ekspert hesab edir ki, səfər ediləcək istiqamətə uyğun valyuta seçimi də vacibdir. Belə ki, avrozonaya gedənlər üçün avro, ABŞ, Kanada, Meksika, eləcə də bir sıra Asiya və Afrika ölkələrinə səfər edənlər üçün isə ABŞ dolları daha praktik seçim hesab olunur. Onun sözlərinə görə, dollar bir çox ölkədə rahat şəkildə dəyişdirilir və geniş qəbul olunur.

“Visa” və “Mastercard” kartları ilə bağlı suala cavab verən Azər İsmayıl bildirib ki, adi istifadəçi üçün bu iki ödəniş sistemi arasında ciddi fərq yoxdur:

“Visa və Mastercard dünyanın əksər ölkələrində problemsiz qəbul olunur. Yekun məbləğə daha çox bankın tətbiq etdiyi məzənnə və komissiyalar təsir göstərir”.

Bununla yanaşı, ekspert “American Express” kartlarından istifadə edənlərə diqqətli olmağı tövsiyə edib:

“American Express bütün ölkələrdə və bütün obyektlərdə qəbul edilmir. Buna görə də səfərdən əvvəl gedəcəyiniz ölkədə otellərin, restoranların və digər xidmət məntəqələrinin bu kartı qəbul edib-etmədiyini yoxlamaq faydalıdır”.

Sonda turizm eksperti səyahətə çıxanlara valyuta mübadiləsindən əvvəl məzənnə və komissiyaları müqayisə etməyi, iri məbləğdə pulu hava limanında dəyişməməyi, gündəlik ödənişlərdə imkan daxilində bank kartından istifadə etməyi və gözlənilməz hallar üçün üzərlərində az miqdarda nağd vəsait saxlamağı tövsiyə edib.

Azadə Ağayeva