"Meta" "Instagram"da mübahisə yaradan funksiyanı sildi

"Meta" istifadəçilərin süni intellekt vasitəsilə ictimai "Instagram" hesablarındakı fotoları dəyişdirməsinə imkan verən yeni funksiyanı güclü tənqidlərdən sonra istifadədən çıxarıb.

Valyuta.az xəbər verir ki, funksiya "Meta Superintelligence Labs" tərəfindən hazırlanmış "Muse Image" adlı yeni süni intellekt şəkil generatoru ilə birlikdə təqdim edilib.

Yeni alət istifadəçilərə istinad etmək istədikləri ictimai Instagram hesabını @ işarəsi ilə qeyd edərək həmin fotolar əsasında yeni şəkillər yaratmağa imkan verirdi. Lakin bu proses zamanı fotoları istifadə olunan hesab sahiblərinə heç bir bildiriş göndərilmirdi. Məhz bu məqam istifadəçilər və məxfilik müdafiəçiləri tərəfindən ciddi tənqid olunub.

"Meta" cümə günü yayımladığı açıqlamada funksiyanın gözlənilən nəticəni vermədiyini etiraf edib.

"Məqsədimiz insanlara faydalı yaradıcı alət təqdim etmək və ictimai məzmunlarının bu şəkildə istifadə olunmasına nəzarət imkanı yaratmaq idi. Lakin istifadəçilərin rəylərini dinlədik və gördük ki, bu funksiya gözləntiləri doğrultmayıb. Buna görə də artıq əlçatan deyil", - şirkət bildirib.

Məlumata görə, funksiyanın ləğvi istifadəçilər, eləcə də məşhurları təmsil edən agentliklər, o cümlədən Creative Artists Agency (CAA) tərəfindən səsləndirilən narahatlıqlardan sonra baş verib.

Sərvanə Rəmixanova