“Apple” başladı, digərləri də qoşuldu: Smartfon qutularından qulaqlıqlar niyə yoxa çıxdı?

Bir neçə il əvvəl yeni smartfon alan istifadəçilər qutuda şarj cihazı, kabel və simli qulaqlıq da əldə edirdilər. Lakin bu gün demək olar ki, bütün istehsalçılar bu ənənədən imtina ediblər. 

Valyuta.az xəbər verir ki, BGR nəşrinin ekspertləri bunun əsas səbəblərini açıqlayıblar.

Qulaqlıqları smartfon qutusundan çıxaran ilk şirkətlərdən biri 2020-ci ildə “iPhone 12” modelinin təqdimatı ilə “Apple” olub. Daha sonra “Samsung” və digər istehsalçılar da eyni addımı atıblar.

Şirkətlər bu qərarı ilk növbədə ekoloji səbəblərlə izah edirlər. Onların fikrincə, istifadəçilərin əksəriyyətinin artıq bir neçə cüt qulaqlığı var və qutuya əlavə edilən ucuz simli modellər çox vaxt istifadə olunmadan elektron tullantıya çevrilir. Bundan əlavə, aksesuarların sayının azaldılması qablaşdırmanın ölçüsünü kiçildir və daşınma xərclərini aşağı salır.

Ekspertlər qeyd edirlər ki, bu qərarın kommersiya tərəfi də var. İstehsalçılar ucuz simli qulaqlıqlar əvəzinə “AirPods”, “Galaxy Buds” və digər simsiz modellərin satışına üstünlük verirlər. Bu məhsullar ayrıca satıldığından şirkətlərə daha çox gəlir gətirir.

Digər mühüm səbəb isə müasir smartfonların böyük əksəriyyətində 3,5 millimetrlik qulaqlıq girişinin artıq olmamasıdır. Buna görə də əvvəlki kimi qutuya daxil edilən simli qulaqlıq xüsusi adapter olmadan istifadə edilə bilmir.

Simli qulaqlıqlara maraq yenidən artır

Simsiz modellərin populyarlığına baxmayaraq, klassik simli qulaqlıqlara maraq yenidən artır. Bir çox istifadəçi onları sabit səs keyfiyyəti, gecikmənin olmaması və batareyanın doldurulmasına ehtiyac duyulmaması səbəbindən üstün tutur.

Belə qulaqlıqları müasir smartfonlara qoşmaq da mümkündür. Bunun üçün 3,5 millimetrlik çıxışı olan Bluetooth qəbuledicilərindən istifadə olunur. Smartfon əvvəlcə adapterə Bluetooth vasitəsilə qoşulur, daha sonra isə simli qulaqlıq həmin adapterə birləşdirilir.

Bəzi müasir adapterlər “LDAC” kodeyini dəstəkləyir. Bu səbəbdən keyfiyyətli qulaqlıqlardan istifadə edildikdə səs keyfiyyətində nəzərəçarpacaq itki müşahidə olunmur.

Paşa Məmmədli