Hindistanın ən böyük şirkətlərindən biri minlərlə AI mühəndisini işə götürəcək

Hindistanın ən böyük proqram təminatı xidmətləri şirkəti olan “Tata Consultancy Services” (TCS) 8 900-ə qədər müştəri yönümlü süni intellekt tətbiqi mühəndisindən ibarət komanda formalaşdırmağı və AI sahəsində satınalmalar həyata keçirməyi planlaşdırır. 

Valyuta.az xəbər verir ki, şirkətin baş icraçı direktoru K. Kritivasan bildirib ki, məqsəd şirkət əməkdaşlarının təxminən 1-1,5 faizinin müştərilərlə birbaşa işləyən süni intellekt tətbiqi mühəndisləri (Forward-Deployed Engineers – FDE) kimi fəaliyyət göstərməsidir.

TCS bu addımla müştərilərə AI alətlərinin tətbiqində dəstək göstərmək üçün oxşar mühəndislərin işə qəbulunu genişləndirən OpenAI, Anthropic və Microsoft kimi şirkətlərlə rəqabət aparacaq.

Mumbayda yerləşən şirkət eyni zamanda süni intellekt, məlumat təhlükəsizliyi və kibertəhlükəsizlik sahələrində mümkün satınalmaları da qiymətləndirir. Şirkətin maliyyə direktoru Samir Seksariya bildirib ki, TCS strateji mövqeyini gücləndirəcək imkanları araşdırır.

Kritivasanın sözlərinə görə, süni intellekt autsorsinq modelini zəiflətməyəcək. O hesab edir ki, şirkətlər AI sistemlərini mövcud infrastrukturla inteqrasiya etmək, müxtəlif modelləri əlaqələndirmək və məlumat axınını idarə etmək üçün yenə də TCS kimi tərəfdaşlara ehtiyac duyacaq.

Bununla yanaşı, TCS-in süni intellektdən əldə etdiyi gəlirin illik artım tempi cari maliyyə ilinin birinci rübündə əvvəlki rübdəki 28 faizdən 13 faizə enib. Şirkət uzunmüddətli perspektivdə bu biznesin rübdən-rübə təxminən 25 faiz artmasını hədəfləyir.

Seksariyanın sözlərinə görə, TCS hər il əməkdaşların inkişafına, təlim proqramlarına və AI texnologiyalarının şirkət daxilində geniş tətbiqinə təxminən 1 milyard ABŞ dolları sərmayə yatırır.

Qeyd edək ki, investorlar süni intellektin Hindistanın 315 milyard dollarlıq informasiya texnologiyaları xidmətləri sənayesinə təsirini yaxından izləyirlər. Bir tərəfdən AI-nin məhsuldarlığı artıracağı gözlənilsə də, digər tərəfdən mühəndis komandalarına tələbatın azalması və qiymətlərə təzyiqin güclənməsi ilə bağlı narahatlıqlar qalmaqdadır.

Rəfiqə Abdin