Şirkət işçilərinə ofisə yaxın yaşamaq üçün hər il 18 min dollar ödəyir

ABŞ-ın Nyu-York şəhərində fəaliyyət göstərən süni intellekt startapı "Rilla" işçilərinə ofisə yaxın ərazidə yaşamaları üçün hər il 18 min ABŞ dolları məbləğində mənzil dəstəyi verir.

Valyuta.az xəbər verir ki, bu barədə şirkətin həmtəsisçisi və baş icraçı direktoru Sebastian Ximenez (Sebastian Jimenez) "Business Insider" nəşrinə müsahibəsində bildirib.

Onun sözlərinə görə, ofisdən təxminən 10 dəqiqəlik velosiped məsafəsində yaşayan əməkdaşlar bu imkandan yararlana bilirlər.

"İnsanların gündəlik həyatındakı maneələri azaltmaq istəyirik ki, onlar diqqətlərini işə daha çox yönəldə bilsinlər", - deyə Ximenez bildirib.

2019-cu ildə yaradılan "Rilla" satış komandaları üçün nitq analitikası (speech analytics) əsasında çalışan süni intellekt həlləri hazırlayır. Şirkət bu ilin əvvəlində Nyu-Yorkun ən bahalı məhəllələrindən biri hesab olunan "Williamsburg" ərazisində yeni ofis açıb. Rəhbərlik hesab edir ki, yüksək kirayə qiymətləri səbəbindən əməkdaşlar daha uzaq ərazilərdə yaşamağa üstünlük verə bilər. Buna görə də şirkət ofisə yaxın yaşayan işçiləri maliyyə baxımından təşviq edir.

Şirkət rəhbərinin sözlərinə görə, "Rilla"da əməkdaşlar adətən gündə 12 saat, həftədə 6 gün çalışırlar. Bu səbəbdən işə gedib-gəlməyə sərf olunan vaxtın azaldılması məhsuldarlıq baxımından mühüm əhəmiyyət daşıyır.

S.Ximenez bildirib ki, hazırda şirkət əməkdaşlarının təxminən 80 faizi bu mənzil dəstəyindən istifadə edir.

"Rilla" bununla kifayətlənmir. Şirkət işçilərinə gündə üç dəfə ödənişsiz yemək təqdim edir. Bundan əlavə, ofisdə idman zalı, sauna və soyuq su hovuzunun (cold plunge) yaradılması da planlaşdırılır.

Ximenez qeyd edib ki, şirkətin korporativ mədəniyyəti kifayət qədər tələbkardır və bu yanaşma İlon Maskın vaxtilə "Twitter" üçün təsvir etdiyi intensiv iş modeli ilə müqayisə oluna bilər.

O, bu yanaşmanın məşhur psixoloq Mihaly Csikszentmihalyi-nin "Flow: The Psychology of Optimal Experience" kitabından ilham aldığını bildirib.

"Bu kitabın əsas ideyası ondan ibarətdir ki, insan həyatının məqsədlərindən biri mümkün qədər çox vaxtı tam diqqət və məhsuldarlıq vəziyyətində keçirməkdir. Biz də məhz bunu optimallaşdırmağa çalışırıq", - deyə şirkət rəhbəri vurğulayıb.

Sərvanə Rəmixanova