“TSMC”nin gəlirləri gözləntiləri üstələyib

Dünyanın ən böyük çip istehsalçısı olan “TSMC”nin ikinci rüb üzrə gəlirləri illik müqayisədə 36% artaraq bazar proqnozlarını geridə qoyub.

Valyuta.az xəbər verir ki, şirkət 2026-cı ilin aprel-iyun aylarını əhatə edən ikinci rübdə 1,27 trilyon Tayvan dolları (təxminən 39,63 milyard ABŞ dolları) gəlir əldə edib. Bu nəticə ötən ilin eyni dövrü ilə müqayisədə 36% artım deməkdir.

“LSEG SmartEstimate” tərəfindən 20 analitikin proqnozları əsasında hazırlanan hesablamada “TSMC”nin ikinci rüb gəlirlərinin 1,264 trilyon Tayvan dolları səviyyəsində olacağı gözlənilirdi. Şirkətin açıqladığı göstərici isə bu proqnozu üstələyib.

Mütəxəssislər artımı əsasən süni intellekt texnologiyalarına olan yüksək tələbatla əlaqələndirirlər. Son illərdə AI tətbiqlərinin sürətlə yayılması qabaqcıl yarımkeçiricilərə ehtiyacı artırıb və bu, “TSMC”nin sifariş portfelinə müsbət təsir göstərib.

Qeyd edək ki, “Taiwan Semiconductor Manufacturing Co” (TSMC) dünyanın ən iri texnologiya şirkətlərindən olan “Nvidia” və “Apple” da daxil olmaqla bir çox şirkətin əsas çip təchizatçılarından biridir.

Şirkət qlobal yarımkeçirici sənayesində strateji mövqeyə malik hesab olunur.

Rəfiqə Abdin