"İnstagram" yeni qayda qəbul edib - Məhdudiyyət qoyulacaq

“Instagram” yeniyetmələr üçün “PG-13” məhdudiyyəti tətbiq edir.

Valyuta.az xəbər verir ki, “Meta” şirkəti “Instagram”da 18 yaşdan aşağı istifadəçilər üçün yeni məhdudiyyətlər tətbiq edib. Bundan sonra yeniyetmələr platformada yalnız “13 yaş və üzəri” üçün nəzərdə tutulmuş məzmunlarla qarşılaşacaq.

Qeyd olunur ki, yeni sistem “PG-13” film reytinq modelinə əsaslanır və bu həftədən etibarən tətbiq olunur. “Meta” bildirib ki, dəyişiklik ilin sonuna qədər bütün hesablar üçün qüvvədə olacaq.

“Bu yenilik valideynlərə inam verəcək. Məqsədimiz yeniyetmələrə təhlükəsiz, yaşına uyğun məzmun göstərməkdir”, - şirkətdən bildirilib.

Yeni qaydalara görə, bütün 18 yaşdan aşağı hesablar avtomatik olaraq “13+ rejimi”nə keçiriləcək. Bu rejimdən çıxmaq yalnız valideyn icazəsi ilə mümkün olacaq.

Yeniyetmələr artıq “spirtli içki”, “qan” kimi ifadələrlə axtarış edə bilməyəcək, həmçinin yaşa uyğun olmayan kontent paylaşan hesabları izləyə bilməyəcəklər.

“Meta” əlavə edib ki, yeni məhdudiyyətlər “Instagram”dakı süni intellekt sistemlərinə də şamil ediləcək və valideynlər üçün ayrıca “Limited Content” rejimi də təqdim olunacaq.

Sərvanə Rəmixanova