500-dən çox startapa investisiya edən investor təsisçilərin ən böyük səhvini açıqladı

Erkən mərhələ startaplarına 10 ildən artıqdır investisiya edən və 500-dən çox şirkəti maliyyələşdirən "Precursor Ventures"ın qurucusu Çarlz Hadson (Charles Hudson) startap təsisçilərinin investisiya cəlb edərkən ən çox yol verdiyi səhvlərdən danışıb.

Valyuta.az xəbər verir ki, Hadsonun fikrincə, təsisçilərin əsas səhvlərindən biri şirkəti mümkün qədər yüksək qiymətləndirməyə (valuation) çalışmalarıdır. O bildirib ki, yüksək qiymətləndirmə hər biznes üçün uyğun deyil və gələcəkdə startap üzərində əlavə təzyiq yarada bilər.

Digər vacib məqam isə investor seçimidir. Hadson təsisçilərə yalnız böyük məbləğə görə qərar verməməyi, potensial investorlar barədə əvvəlcədən araşdırma aparmağı tövsiyə edib. Onun sözlərinə görə, investorun əvvəlki portfel şirkətləri ilə danışmaq, təqdim etdiyi dəstək və əlaqələri yoxlamaq vacibdir.

O, həmçinin vurğulayıb ki, hər uğurlu biznes mütləq vençur kapitalı üçün uyğun deyil. Vençur investorları sürətli böyümə və yüksək gəlir potensialı olan şirkətlər axtarır. Buna görə də təsisçilər ilk növbədə biznes modellərinin bu tələblərə cavab verib-vermədiyini qiymətləndirməlidirlər.

Hadson əlavə edib ki, son illərdə investisiya bazarı ciddi dəyişib. Bu gün investorlar startapları təkcə digər yeni şirkətlərlə deyil, sürətlə böyüyən süni intellekt startapları ilə də müqayisə edirlər. Nəticədə bir çox startap üçün əvvəl kifayət qədər yaxşı hesab olunan artım tempi artıq investorları qane etmir.

Sərvanə Rəmixanova