İlon Mask və Ceff Bezos bu qaydaya əməl edir: "Dörd ocaq gözü" nədir?

"Dörd ocaq gözü” nəzəriyyəsi dünyanın ən uğurlu insanlarının belə nailiyyətləri naminə müəyyən qurbanlar verməsinin səbəbini izah edən sadə konsepsiya kimi getdikcə daha çox populyarlıq qazanır. 

Valyuta.az xəbər verir ki, "Your Tango" nəşrinin yazdığına görə, bu nəzəriyyə tez-tez həyatlarının böyük hissəsini şirkətlərinin inkişafına həsr etmiş İlon Mask və Ceff Bezos kimi sahibkarlarla əlaqələndirilir.

Konsepsiyanın müəllifi kimi amerikalı komediya ustası Devid Sedaris göstərilir. Nəzəriyyə isə yazıçı Ceyms Klirin sayəsində geniş tanınıb.

Nəzəriyyənin mahiyyəti ondan ibarətdir ki, insan həyatını dörd ocaq gözü olan sobaya bənzətmək olar. Hər ocaq gözü həyatın əsas istiqamətlərindən birini – ailəni, dostları, sağlamlığı və işi təmsil edir. Lakin "yanacaq", yəni vaxt, enerji və diqqət həmişə məhdud olur.

Bu yanaşmaya görə, uğur qazanmaq üçün insan çox vaxt həmin ocaq gözlərindən birini "söndürməyə" məcbur qalır. Söhbət qeyri-adi və böyük uğurdan gedirsə, bəzən iki, hətta üç sahəni də qurban vermək lazım gəlir.

Nəzəriyyə ailədən və ya sağlamlıqdan mütləq imtina etməyi tövsiyə etmir. O, sadəcə xatırladır ki, hər bir qərarın öz bədəli var. İşə sərf olunan hər əlavə saat avtomatik olaraq ailəyə, dostlara və ya istirahətə ayrılan vaxtı azaldır.

Eyni zamanda, konsepsiyanın tərəfdarları vurğulayırlar ki, balans həyatın bütün sahələrinə eyni qədər vaxt ayırmaq demək deyil. Müxtəlif dövrlərdə prioritetlər dəyişə bilər. Bəzi mərhələlərdə karyera daha çox diqqət tələb etdiyi halda, digər dövrlərdə ailə və ya şəxsi sağlamlıq ön plana çıxa bilər.

Nəzəriyyənin əsas ideyası insanı daim nələrdənsə imtina etməyə çağırmaq deyil, onu şüurlu seçim etməyə təşviq etməkdir. Konsepsiya insanın özünə səmimi şəkildə hazırda onun üçün nəyin daha vacib olduğunu müəyyənləşdirməsini və eyni anda həyatın bütün sahələrində mükəmməl olmağa çalışmamasını tövsiyə edir.

Bununla yanaşı, konsepsiyanın müəllifi vurğulayır ki, uğurun vahid tərifi yoxdur. Bəziləri üçün uğur milyardlarla dollar dəyərində biznes qurmaqdır, digərləri üçün isə möhkəm ailə yaratmaq və ya özü ilə harmoniya içində yaşamaqdır. Məhz buna görə də "dörd ocaq gözü" nəzəriyyəsi başqalarının uğur meyarlarını təkrarlamağa deyil, hər kəsi öz həyat prioritetlərini müəyyənləşdirməyə çağırır.

Paşa Məmmədli