"Netflix" 24/7 yayımlanacaq canlı TV kanalları yaratmağa hazırlaşır

"Netflix" istifadəçi aktivliyini artırmaq üçün 24 saat fasiləsiz yayımlanacaq canlı televiziya kanallarını istifadəyə verməyi nəzərdən keçirir.

Valyuta.az xəbər verir ki, bu barədə "The Wall Street Journal" məlumat yayıb.

Məlumata görə, yeni xidmət sayəsində istifadəçilər konkret film və ya serial seçmək əvəzinə, günün istənilən vaxtı fasiləsiz yayımlanan kanallara qoşula biləcəklər. Bu addım "Netflix"i Pluto TV" və "Tubi" kimi pulsuz, reklam dəstəkli yayım platformaları ilə daha birbaşa rəqabətə çıxara bilər.

Bildirilir ki, şirkət eyni zamanda "Apple" və "Amazon"un təklif etdiyi paket xidmətlərinə bənzər abunə modellərini də araşdırır. Müzakirə olunan potensial tərəfdaşlar arasında "Peacock" platformasının da olduğu qeyd edilir.

"Netflix" hələlik bu xəbərlə bağlı rəsmi açıqlama verməyib.

Qeyd edək ki, şirkət son aylarda istifadəçi marağını artırmaq üçün qısa videolar, video podkastlar və uşaqlar üçün oyun tətbiqi kimi yeni məhsulları da sınaqdan keçirir. Bundan əlavə, mediada yayılan məlumatlara görə, "Netflix" film həvəskarları üçün nəzərdə tutulan Letterboxd platformasını satın almaq imkanını da dəyərləndirir.

Sərvanə Rəmixanova