İnvestorlar startapları kəşf etmək üçün "ChatGPT"yə üz tutur

Süni intellekt texnologiyalarının sürətlə inkişafı startapların məhsul və xidmətlərini tanıtmaq üsullarını da dəyişir. Artıq potensial müştərilər, investorlar və iş axtaranlar şirkətlər haqqında məlumat əldə etmək üçün "Google" axtarışından daha çox "ChatGPT", "Claude" və "Gemini" kimi süni intellekt platformalarına üz tuturlar. Bu isə startapların PR və kommunikasiya strategiyalarını yenidən nəzərdən keçirməsini zəruri edir.

Mütəxəssislərin fikrincə, süni intellekt istifadəçilərin şirkətləri kəşf etməsi, qiymətləndirməsi və tövsiyə alması prosesini bir platformada cəmləşdirir. Buna görə də AI sistemlərində görünmək artıq startaplar üçün rəqabət üstünlüyünə çevrilir.

AI ən çox hansı mənbələrə etibar edir?

2026-cı ilin may ayında PR analitika şirkəti Mak Rak tərəfindən dərc olunan hesabata görə, süni intellekt modellərinin istinad etdiyi mənbələrin təxminən 84%-ni müstəqil media və üçüncü tərəf nəşrləri təşkil edir. Ödənişli reklam və sponsorlu məzmunun payı isə cəmi 0,3% səviyyəsindədir.

SEO şirkəti "Ahrefs" də 75 min brend üzərində apardığı araşdırmada oxşar nəticəyə gəlib. Digər araşdırmalar göstərir ki, eyni məzmunun nüfuzlu media orqanlarında dərc olunması şirkətin AI platformalarında görünməsini orta hesabla 239% artırır.

Bu səbəbdən ekspertlər hesab edirlər ki, süni intellekt üçün etibarlı və müstəqil media materialları həm görünürlük, həm də etibar baxımından əsas rol oynayır.

Kiçik sahə nəşrləri daha effektiv ola bilər

Bir çox startap ilk gündən dünyanın ən böyük media qurumlarında yer almağa çalışır. Lakin PR mütəxəssisləri bunun erkən mərhələdə real strategiya olmadığını bildirirlər.

Əvəzində müəyyən sahə üzrə ixtisaslaşmış media orqanları və peşəkar nəşrlər daha əlçatan olmaqla yanaşı, süni intellekt modelləri tərəfindən də daha etibarlı mənbə kimi qiymətləndirilir. Mütəmadi olaraq bu platformalarda görünmək şirkətin AI sistemlərində daha tez-tez təqdim olunmasına kömək edir.

Hər şeyi idarə etmək mümkün deyil

Araşdırmalara görə, "Wikipedia", "Reddit" və məhsul qiymətləndirmə platformaları AI modellərinin ən çox istinad etdiyi mənbələr sırasındadır. Lakin bu platformalarda görünmək və ya məzmuna təsir etmək olduqca çətindir.

Məsələn, "B2B" proqram təminatı sahəsində G2 platforması süni intellektin ən çox istinad etdiyi mənbələrdən biri hesab olunur.

Ekspertlər bildirirlər ki, əvvəllər SEO üçün vacib sayılan "backlink"lər artıq AI görünürlüğündə əvvəlki qədər təsirli deyil. Əvəzində internetdə brend haqqında etibarlı mənbələrdə edilən qeyd və müzakirələr daha böyük rol oynayır.

Şirkətin öz platformaları da önəmlidir

Startapların tam nəzarət edə bildiyi əsas resurslar isə öz veb-saytları, bloqları və sosial media hesablarıdır.

Araşdırmalara əsasən, AI istinadlarının təxminən 16%-i məhz şirkətin öz mənbələrindən formalaşır. Buna görə də ekspertlər saytın texniki baxımdan düzgün optimallaşdırılmasını, strukturlaşdırılmış məlumatlardan (structured data), düzgün başlıqlardan və sual-cavab formatlarından istifadə edilməsini tövsiyə edirlər.

Canlı ünsiyyət hələ də əvəzolunmazdır

Mütəxəssislər vurğulayırlar ki, süni intellekt mövcud məlumatları emal etməkdə güclü olsa da, real həyatda formalaşan etibarı əvəz edə bilmir.

Konfranslar, panel müzakirələri, podkastlar və sahə ekspertlərinin çıxışları hələ də şirkətin nüfuzunun formalaşmasında əsas vasitələrdən biri olaraq qalır. Xüsusilə B2B sektorunda auditoriya sahə üzrə tanınmış ekspertlərin fikirlərinə daha çox etibar edir.

AI üçün deyil, insanlar üçün yazın

Məqalədə vurğulanır ki, "yalnız süni intellekt üçün məzmun hazırlamaq" düzgün yanaşma deyil. Əvvəlcə insanların etibar etdiyi media və platformalarda nüfuz qazanmaq lazımdır. Bundan sonra AI sistemləri də həmin etibarlı mənbələrə əsaslanaraq şirkət haqqında məlumat təqdim edir.

Sərvanə Rəmixanova