Azərbaycanlı startapçı: "Bakı ofisində komandanı 200 nəfərə çatdırmağı planlaşdırırıq"

"Süni intellektdən və texnologiyadan danışanda heç kim gələcəyin dəqiq necə olacağını bilmir. Təəssüf ki, bu sahədə tam aydınlıq yoxdur, lakin gələcəyi də məhz biz və siz qurursunuz".

Valyuta.az xəbər verir ki, bu fikirləri ADA Universitetində "Baku ID" çərçivəsində "SABAH.academy" tərəfindən 6-cı "University Demo Day" startap müsabiqəsində ABŞ-da fəaliyyət göstərən "Polygraf AI" şirkətinin təsisçisi və baş icraçı direktoru Yaqub Rəhimov deyib.  

Y.Rəhimov bildirib ki, təxminən üç il əvvəl Vaşinqtonda bu universitetdən (ADA-dan) gəlmiş dörd mübadilə tələbəsi ilə tanış olub.

"Həmin tələbələr sonradan şirkətimizin ilk süni intellekt mühəndislərindən oldular. Bu gün həmin mühəndislər ABŞ-ın aparıcı qurumlarına süni intellekt və kibertəhlükəsizlik sahəsində həllər təqdim edirlər".

Təsisçinin sözlərinə görə, qlobal fəaliyyət göstərən, şirkət, eyni zamanda qısa müddət əvvəl Dubayda mühüm layihə həyata keçirib:

"Biz dünən gecə Dubaydan gəlmişik. Orada cəmi 48 saat ərzində gəmiçilik sənayesi üçün möhtəşəm süni intellekt həllini tətbiq etdik".

Y.Rəhimov qeyd edib ki, "Polygraf" artıq əsasən gəlirli şirkətə çevrilib:

"Polygraf" böyüdükcə gəlirli şirkətə çevrilir. Dünyanın aparıcı vençur investisiya fondlarının dəstəyi ilə fəaliyyət göstəririk. Bundan əlavə, dəqiqlik, emal sürəti və performans baxımından öz sahəmizdə dünya üzərə birinci yerə yüksəlmişik".

O vurğulayıb ki, şirkət böyüdükcə, insanlarla birlikdə böyümək də vacibdir:

"Mənim doğulduğum və böyük potensial gördüyüm bu gözəl regionda çox böyük imkanlar görürük. Məhz buna görə ABŞ-da fəaliyyət göstərən "Polygraf AI" şirkətinin törəmə müəssisəsi olan "Polygraf Labs"ın Bakı ofisini qarşıdakı 12 ay ərzində 200 nəfərlik komandaya çatdırmağı hədəfləyirik".

Mayya Hüseynova