"Google Xəritələr" Cənubi Koreyada niyə tam işləmir?

Cənubi Koreyaya səfər edən turistlər və ölkədə yaşayan əcnəbilər bəzi hallarda texnoloji vərdişlərini dəyişməli olurlar. Dünyanın əksər yerlərində naviqasiya dedikdə ilk ağla gələn tətbiqlərdən biri olan “Google Xəritələr” (Google Maps) Koreya yarımadasında məhdud imkanlarla fəaliyyət göstərir.

Valyuta.az xəbər verir ki, istifadəçilər tətbiq vasitəsilə otelləri tapa, restoran rəylərinə baxa və xəritə şəkillərini araşdıra bilirlər. Lakin bir nöqtədən digərinə marşrut qurmağa çalışdıqda avtomobillə, piyada və ya velosipedlə hərəkət üçün naviqasiya seçimləri təqdim olunmur.

Bu vəziyyət son 20 ildə Seul hökuməti ilə “Google” arasında davam edən bürokratik mübahisələrin nəticəsidir. Tərəflər 2026-cı ilin fevralında müəyyən razılığa gəlsələr də, “Google Xəritələr”in tam funksional naviqasiya imkanları hələ də istifadəçilərə təqdim edilməyib. Maraqlıdır ki, “Waze” kimi digər xəritə xidmətləri ölkədə problemsiz işlədiyi halda, “Google Xəritələr” bu məhdudiyyətlərlə üzləşir.

Mübahisənin kökü 2006–2008-ci illərdə “Google Earth” platformasında yaşanan yer adları ilə bağlı fikir ayrılığına gedib çıxır. Həmin dövrdə şirkət hökumətin düzəliş tələblərini qəbul etməyərək yapon dilində yer adlarından istifadəni davam etdirib. Bundan sonra Cənubi Koreya hökuməti 1:25 000 miqyaslı peyk xəritəsini öz imkanları hesabına hazırlayıb. 2016-cı ildə isə 1:5 000 miqyaslı daha dəqiq xəritə məlumatları istifadəyə verilib. Bununla yanaşı, hökumət bu məlumatların xarici şirkətlər tərəfindən ölkə hüdudlarından kənara çıxarılmasına ciddi məhdudiyyətlər tətbiq edib.

Seulun əsas narahatlığı Şimali Koreya ilə davam edən atəşkəs rejimi və bunun yaratdığı təhlükəsizlik riskləri olub. Hökumət “Google”un hərbi obyektləri və digər həssas məkanları xəritə məlumatlarından çıxarmaqdan imtina etməsi səbəbindən məlumatların ölkədən kənara ötürülməsinə razılıq verməyib. “Google” isə 2025-ci ilin avqustunda bu məlumatların rəqib xidmətlər vasitəsilə də əldə oluna bildiyini bildirsə də, hökumətlə əməkdaşlıq edərək həssas obyektlərin maskalanmasına razılıq verib.

Yeni mərhələ və yerli alternativlər

2026-cı ilin fevralında əldə olunan razılaşma xəritə məlumatlarının ölkə xaricinə ötürülməsi üçün yeni qaydalar müəyyənləşdirib. Bu çərçivədə “Google” məlumatları xaricə çıxarmazdan əvvəl onları yerli serverlərdə emal etməli və hökumətin razılığını almalıdır. Küçə görüntüsü xidmətində həssas ərazilərin bulanıqlaşdırılması və koordinat sisteminin uyğunlaşdırılması da razılaşmanın əsas şərtləri sırasındadır. “Apple Maps” kimi xidmətlər müəyyən naviqasiya imkanları təqdim etsə də, yüksək dəqiqlikli xəritələr üzrə təsdiq prosedurları hələ tamamlanmayıb.

Cənubi Koreyada yaranan bu boşluğu isə yerli tətbiqlər doldurur. Ölkədə “Naver Maps”, “KakaoMap” və “TMAP” bazara üstünlük edir. “Naver Maps” ingilisdilli dəstəyi və küçə görüntüsü funksiyası ilə xarici turistlər üçün əlverişli seçim hesab olunur. “KakaoMap” müxtəlif ictimai nəqliyyat marşrutları ilə seçilir. “TMAP” isə 20 milyondan çox istifadəçidən toplanan real vaxt məlumatları sayəsində ölkənin ən inkişaf etmiş naviqasiya xidmətlərindən biri hesab edilir.

Paşa Məmmədli