Uzaqdan iş tapmaq istəyənlərin diqqət etməli olduğu 8 məqam

Uzaqdan işləmək artıq istisna deyil, bir çox şirkət bu iş modelini daimi strategiyasına çevirib. Bu yanaşma əməkdaşlara daha çox çeviklik və iş-həyat balansı qazandırır. Bəs etibarlı uzaqdan işi haradan tapmaq olar və saxta elanlardan necə yayınmaq lazımdır?

Valyuta.az xəbər verir ki, "Digital Nomad World" platformasında yayımlanan bələdçiyə əsasən, uzaqdan iş tapmaq istəyənlər üçün 8 əsas məqam ön plana çıxır.

1. CV-nizi uzaqdan işə uyğunlaşdırın

Uzaqdan iş üçün CV-də müstəqil işləmə bacarığı, zaman idarəetməsi, rəqəmsal ünsiyyət və məsuliyyətlilik xüsusi vurğulanmalıdır. Əgər əvvəlki uzaqdan iş təcrübəniz varsa, bunu mütləq qeyd edin. Texnologiya bilikləri, problem həll etmə və özünü motivasiya bacarıqları əsas üstünlüklər sayılır.

2. Xüsusi uzaqdan iş platformalarından istifadə edin

Uzaqdan iş tapmaq üçün ixtisaslaşmış vakansiya saytlarına üstünlük verilməsi tövsiyə olunur. Bu platformalar müxtəlif sahələr üzrə remote vakansiyaları bir mərkəzdə toplayır. Bildiriş (alert) funksiyalarını aktiv etmək yeni elanları vaxtında görməyə kömək edir.

3. Onlayn şəbəkələşməni (networking) gücləndirin

Uzaqdan iş bazarında şəxsi əlaqələr hələ də həlledici rol oynayır. "LinkedIn", "Slack icmaları", peşəkar forumlar və sosial şəbəkə qrupları yeni imkanlar yarada bilər. Mütəxəssislər virtual tədbirlərdə və vebinarlarda aktiv olmağı tövsiyə edir.

Qeyd olunur ki, sosial şəbəkələrdə paylaşılan elanlarda saxtakarlıq halları da ola bilər, buna görə diqqətli olmaq vacibdir.

4. Uzaqdan işləməni dəstəkləyən şirkətləri araşdırın

Bir çox startap və iri şirkət artıq tam uzaqdan və ya hibrid iş modelinə keçib. Şirkətlərin rəsmi saytları, "LinkedIn" səhifələri və iş elanları onların uzaqdan iş siyasəti barədə aydın məlumat verir. Bəzi vakansiyalar ofis + uzaqdan formatda olur ki, bu da yeni başlayanlar üçün keçid mərhələsi sayıla bilər.

5. Rəqəmsal bacarıqlarınızı inkişaf etdirin

Uzaqdan iş texnologiyasız mümkün deyil. Videozənglər, layihə idarəetmə sistemləri, onlayn sənəd paylaşımı və komanda platformaları ilə işləmək bacarığı işə qəbul şansını artırır. Zoom, Slack, Trello, Asana və Google Workspace kimi alətlərlə tanışlıq üstünlük hesab olunur.

6. Onlayn müsahibələrə hazır olun

Uzaqdan iş müsahibələri adətən videoformatda keçirilir. Sabit internet, sakit mühit, kamera və səs keyfiyyəti önəmlidir. Bəzi şirkətlər namizədlərdən qısa video təqdimat da tələb edir ki, bu da kamera qarşısında ünsiyyət bacarığını ölçmək məqsədi daşıyır.

7. Motivasiya məktubunu (cover letter) fərdiləşdirin

Hər vakansiya üçün ayrıca yazılmış motivasiya məktubu vacibdir. Məktubda uzaqdan işləməyə uyğunluğunuz, komanda ilə virtual əməkdaşlıq təcrübəniz və məsuliyyətli iş üslubunuz ön plana çəkilməlidir.

8. Uzaqdan iş təcrübənizi nümayiş etdirin

Əgər əvvəl remote layihələrdə iştirak etmisinizsə, bunu CV-də, motivasiya məktubunda və müsahibədə konkret nümunələrlə izah edin. Müstəqil işləmək, tapşırıqları nəzarətsiz icra etmək və planlama bacarığı uzaqdan işdə əsas meyarlardır.

Sərvanə Rəmixanova