Şirkətlər “Bank VTB Azərbaycan”dan 17 milyon manatdan çox depozitlərini geri götürüblər

VTB Azərbaycan 2025-ci ildə 9 milyon 111 min manat xalis mənfəət əldə edib. Bu göstərici 2024-cü ildə 9 milyon 538 min manat təşkil etmişdi.

Valyuta.az xəbər verir ki, bankın xalis mənfəəti 427 min manat və ya 4,47% azalıb.

Bankın cəmi aktivləri də azalıb. 2024-cü ildə 317 milyon 98 min manat olan aktivlər 2025-ci ilin sonuna 306 milyon 222 min manata enib. Bu isə 10 milyon 876 min manat və ya 3,43% azalma deməkdir. Aktivlərdəki azalmanın əsas səbəbi nağd pul vəsaitləri və onların ekvivalentləri üzrə göstəricidəki ciddi geriləmədir – bu göstərici 2024-cü ildə 47 milyon 731 min manat, 2025-ci ildə isə cəmi 17 milyon 534 min manat olub. Azalma 30 milyon 197 min manat və ya 63,2%-dir.

Kredit portfelində də daralma qeydə alınıb. Biznes kreditləri 2024-cü ildə 78 milyon 533 min manat ikən, 2025-ci ildə 67 milyon 536 min manat təşkil edib. Bu, 10 milyon 997 min manat və ya 14% azalma deməkdir. Eyni zamanda, banklar və digər maliyyə institutlarına verilən kreditlər 2024-cü ildə 10 milyon 239 min manat olduğu halda, 2025-ci ildə bu rəqəm 7 milyon 166 min manata düşüb (30%-lik azalma).

Cəmi öhdəliklər – 2024-cü ildə 216 milyon 112 min manat olan öhdəliklər 2025-ci ilin sonuna 196 milyon 290 min manata enib.  Öhdəliklərdəki azalma əsasən depozitlərin geriləməsi ilə bağlıdır. Belə ki, 2024-cü ildə 114 milyon 153 min manat olan depozitlər, 2025-ci ildə 101 milyon 814 min manata düşüb (12 milyon 339 min manat və ya 10,8% azalma).

Hüquqi şəxslərin depozitləri üzrə daha çox azalma müşahidə olunur – 2024-cü ildə 44 milyon 105 min manat, 2025-ci ildə isə 26 milyon 552 min manat. Bu isə 17 milyon 553 min manat və ya 39,8% azalma deməkdir.

Bununla belə, faiz gəlirlərində artım müşahidə olunub. 2024-cü ildə 32 milyon 612 min manat olan faiz gəlirləri, 2025-ci ildə 40 milyon 446 min manata yüksəlib – bu da 7 milyon 834 min manat və ya 24% artım deməkdir. Qeyri-faiz gəlirləri isə nisbətən stabil qalıb – 2024-cü ildə 14 milyon 790 min manat, 2025-ci ildə isə 14 milyon 896 min manat olub (0,7% artım).

Eyni zamanda, faiz və qeyri-faiz xərcləri də artıb. Faiz xərcləri 8 milyon 483 min manatdan 10 milyon 89 min manata yüksəlib (1 milyon 606 min manat və ya 18,9% artım), qeyri-faiz xərcləri isə 29 milyon 845 min manatdan 34 milyon 148 min manata qalxıb (4 milyon 303 min manat və ya 14,4% artım).

Mayya Hüseynova