Acun Ilıcalının iş ortağı saxlanılıb - O, kimdir?

"Acun Medya"nın baş koordinatoru və televiziya proqramçısı Esat Yontunç dünən İstanbul Hava Limanında saxlanılıb.

Valyuta.az xəbər verir ki, Acun Ilıcalının həm yaxın dostu, həm də uzun illərdir əməkdaşlıq etdiyi Yontunç, bu gün ifadə vermək üçün prokurorluğa göndərilib.

İstanbul Cümhuriyyət Baş Prokurorluğunun Qaçaqmalçılıq, Narkotik və İqtisadi Cinayətlər üzrə İstintaq Bürosu tərəfindən aparılan və məşhurları əhatə edən narkotik istintaqı çərçivəsində, ölkə xaricində olduğu müəyyən edilən "Acun Medya"nın baş koordinatoru Esat Yontunç barəsində axtarış qərarı çıxarılıb. "Survivor" proqramının çəkilişləri üçün Dominikdə olan Yontunç dünən Türkiyəyə dönüb və hava limanında saxlanılıb.

Gecəni Polis İdarəsində keçirən Yontunç, məhkəmə-tibbi ekspertizaya aparılaraq orada qan və saç nümunələri verdikdən sonra prokurorluğa ifadə vermək üçün məhkəməyə göndərilib.

Televiziya proqramçısı və media meneceri olan Esat Yontunç uzun illərdir ki, Türkiyədə televiziya sahəsində fəaliyyət göstərir. O, "Acun Medya"nın qurucusu və rəhbəri Acun Ilıcalının həm yaxın dostu, həm də iş ortağı kimi tanınır.

Acun Ilıcalı ilə əməkdaşlığı

Esat Yontunç, 2000-ci illərin əvvəllərindən bəri Acun Ilıcalı ilə birlikdə işləyir. Onların əməkdaşlığı Acun Ilıcalının ATV kanalında çalışdığı dövrlərə - "Acun Firarda" proqramının yayımlandığı illərə təsadüf edir. Bu əməkdaşlıq illər ərzində inkişaf edərək "Acun Medya"nın yaradılmasına və Türkiyədə reytinqli TV layihələrinin ərsəyə gəlməsinə səbəb olub.

Yontunç, "Acun Medya"da baş koordinator vəzifəsini icra edir və "Survivor", "O Ses Türkiye", "Yetenek Sizsiniz Türkiye" kimi populyar proqramların hazırlanmasında əsas rollardan birini oynayıb. O, həm çəkilişlərdə texniki və yaradıcı işlərin koordinasiyasına nəzarət edir, həm də layihələrin beynəlxalq səviyyədə uyğunlaşdırılmasında iştirak edir.

Mayya Hüseynova