Uorren Baffet 20 ildən sonra ilk dəfə qeyts fonduna ianə vermədi: 6 milyard dollar ailə fondlarına getdi

Dünyanın ən məşhur investorlarından biri olan Uorren Baffet, son iyirmi ildə ilk dəfə olaraq illik xeyriyyə ianələrindən Bill Qeytsin fondunu kənarda qoyub. Berkşir Hatavey holdinqinin 95 yaşlı rəhbəri bu il təxminən 6 milyard dollar dəyərindəki səhmlərini tamamilə öz ailəsinə məxsus dörd xeyriyyə fonduna yönəldib.

Baffetin bu qərarı, Microsoft şirkətinin qurucusu Bill Qeytsin qalmaqallı maliyyəçi Cefri Epşteyn ilə keçmiş əlaqələrinin yenidən ictimaiyyətin diqqət mərkəzinə düşməsindən sonraya təsadüf edir. Mətbuatda yayılan xəbərlərə görə, Baffet Qeyts Fondunun Epşteyn ilə əlaqələrinin araşdırılması üzrə hüquqşünasların apardığı təhqiqatın nəticələrini gözlədiyi üçün öz ənənəvi ianəsini dondurub. O, verdiyi müsahibələrdən birində məsələ tam aydınlaşana qədər Qeytslə söhbət etməyin mənasız olduğunu bildirmişdi.

Bu ilki qərara əsasən, Baffetin ianə etdiyi Berkşir Hatavey səhmlərinin böyük hissəsi onun mərhum həyat yoldaşının adını daşıyan Syuzan Tompson Baffet Fonduna, qalan hissəsi isə övladlarının idarə etdiyi Şervud, Hovard Baffet və Novo fondlarına paylanıb. Bu addım Baffetin 2006-cı ildə verdiyi və həyatı boyu Qeyts Fonduna hər il ianə edəcəyinə dair vədin pozulması deməkdir. Belə ki, milyarder indiyədək həmin fonda 47 milyard dollardan çox vəsait ayırmışdı.

Açıqlama verən Uorren Baffet eyni zamanda gələcək planlarını da bölüşüb. O, övladlarının yaşlandığını qeyd edərək, holdinqdəki bütün qalan səhmlərinin 2034-cü ilin dekabrına qədər tamamilə xeyriyyə məqsədləri üçün paylanmasını hədəflədiyini bildirib. Bu qərar Baffetin ölümündən sonra qalan sərvətinin necə idarə olunacağı ilə bağlı planların daha da sürətləndiyini göstərir.

Şəbnəm İbrahimxəlilova