"Trendyol"un hər 1 lirəlik fəaliyyəti Türkiyə iqtisadiyyatına təxminən 7 lirə təsir edir

"Hər 1 türk lirəsi dəyərində iqtisadi fəaliyyət Türkiyə iqtisadiyyatında 6,94 türk lirəsi təsir formalaşdırır".

Valyuta.az xəbər verir ki, bu sözləri "Trendyol Group"un baş icraçı direktoru (CEO) Erdem İnan bildirib.

Onun sözlərinə görə, "Trendyol" yerli istehsalçılar, kiçik sahibkarlar və KOBİ-lərlə birlikdə ölkə iqtisadiyyatına hər gün daha çox dəyər qatır. Platforma Türkiyənin müxtəlif bölgələrində fəaliyyət göstərən biznes tərəfdaşlarının məhsullarını təkcə daxili bazarda deyil, Avropa və Asiyada milyonlarla istifadəçiyə çatdırır.

İnan qeyd edib ki, "Trendyol" üzərindən həyata keçirilən ticarət yalnız platformadakı satışlarla məhdudlaşmır, istehsal, logistika, pərakəndə ticarət, tekstil və geyim sənayesi kimi bir çox sahədə məşğulluq və gəlir yaradır.

CEO vurğulayıb ki, "Trendyol KOBİ"lər üçün inkişaf və elektron ixrac imkanlarını genişləndirərək Anadolu istehsalının qlobal bazarlara çıxmasına dəstək verir.

Qeyd edək ki, Erdem İnan 2023-cü ilin avqust ayından "Trendyol Group"un baş icraçı direktoru vəzifəsini icra edir.

Sərvanə Rəmixanova