Ən uğurlu komandalar niyə tükənmir?

Yüksək nəticə əldə edən komandaların uğuru təkcə peşəkar əməkdaşlardan asılı deyil. Yeni araşdırma göstərir ki, düzgün təşkil olunan iş mühiti, effektiv vaxt idarəetməsi və açıq komanda mədəniyyəti yüksək performansın əsasını təşkil edir.

Valyuta.az xəbər verir ki, psixoloq və davranış elmləri üzrə mütəxəssis Ron Fridman "Superteams: The Science and Secrets of High-Performing Teams" kitabında yüksək performanslı komandaları fərqləndirən beş əsas amili açıqlayıb.

Müəllifin fikrincə, adi komandalar vaxtlarının böyük hissəsini iclaslara və yazışmalara sərf etdiyindən əməkdaşların əsas işlərinə kifayət qədər vaxt qalmır. Araşdırmaya görə, orta statistik əməkdaş həftədə 18 saatını iclaslarda, 11 saatını isə mesaj və elektron məktublara cavab verməklə keçirir. Bu isə uzunmüddətli perspektivdə tükənmişlik (burnout) riskini artırır.

Fridman qeyd edir ki, yüksək performanslı komandalar lazımsız iclaslardan qaçır, diqqəti yayındıran amilləri minimuma endirir və əməkdaşlara fasiləsiz işləmək üçün xüsusi vaxt ayırırlar. Bu komandalarda "Qərar yoxdursa, iclas da yoxdur" prinsipi tətbiq edilir və görüşlər mümkün qədər qısa keçirilir.

Araşdırmada həmçinin bildirilir ki, yüksək nəticə göstərən komandalarda motivasiyanın əsas mənbəyi rəhbər deyil, komanda üzvləridir.

Sorğu iştirakçılarının 94 faizi həmkarlarının onları daha yaxşı işləməyə həvəsləndirdiyini, 82 faizi isə rəhbəri deyil, komanda yoldaşlarını məyus etməkdən daha çox çəkindiyini bildirib.

Müəllifin sözlərinə görə, uğurlu komandalar davamlı inkişafı prioritet hesab edir. Onlar müntəzəm geribildirim mühiti yaradır, yeni ideyaları sınaqdan keçirir və adi komandalarla müqayisədə 50 faiz daha çox eksperiment aparırlar.

R.Fridman vurğulayır ki, yüksək performanslı komandaların rəhbərləri əməkdaşların səhv etməkdən qorxmadığı mühit formalaşdırırlar. Onlar öz səhvlərini açıq şəkildə etiraf edir, bilmədiklərini gizlətmir və əməkdaşları risk etməyə təşviq edirlər. Müəllif hesab edir ki, yüksək nəticələrin əsasında mükəmməllik deyil, davamlı öyrənmə, innovasiya və inkişaf dayanır.

Sərvanə Rəmixanova