Çinin "CXMT" şirkəti 4,3 milyard dollar cəlb etməyi planlaşdırır

Çinin ən böyük yaddaş çipi istehsalçısı olan "Changxin Memory Technologies" ("CXMT") Şanxay Fond Birjasında keçiriləcək ilkin kütləvi səhm təklifi (IPO) çərçivəsində 29,5 milyard yuan (təxminən 4,34 milyard ABŞ dolları) vəsait cəlb etməyi hədəfləyir.

Valyuta.az şirkətin yaydığı məlumata istinadən xəbər verir ki, sifariş kitabının formalaşdırılması prosesi iyulun 15-də başlayacaq, investorlardan sifarişlərin qəbulu isə iyulun 16-da həyata keçiriləcək.

Uzun müddətdir texnoloji baxımdan Cənubi Koreyanın "Samsung Electronics" və "SK Hynix" şirkətlərindən geri qaldığı hesab edilən "CXMT" son illərdə fəaliyyətini əhəmiyyətli dərəcədə genişləndirib.

Şirkətin IPO-su qlobal yaddaş çipi bazarında volatilliyin artdığı və texnologiya sektorunda investor fəallığının zəifləməyə başladığı bir dövrə təsadüf edir.

Analitiklər hesab edirlər ki, bu qədər böyük həcmli səhm yerləşdirilməsi Çin fond bazarında likvidliyə də müəyyən təsir göstərə bilər.

ABŞ tərəfindən qara siyahıya salınan "CXMT" emissiya prospektində bildirib ki, IPO vasitəsilə cəlb olunacaq vəsait istehsal güclərinin artırılmasına, istehsal xətlərinin modernləşdirilməsinə və yeni texnologiyaların tətbiqinə sərf ediləcək.

Şirkət hazırda təxminən 7,7 faiz bazar payı ilə dünyanın dördüncü ən böyük DRAM yaddaş çipi istehsalçısıdır. Son dövrdə yaddaş çiplərinə tələbatın artması "CXMT"nin maliyyə göstəricilərinə də müsbət təsir edib.

Şirkətin 2026-cı ilin birinci rübündə gəlirləri illik müqayisədə 700 faiz artaraq 50,8 milyard yuan təşkil edib.

Hesabat dövründə xalis mənfəət 25 milyard yuana yüksəlib. Müqayisə üçün qeyd edək ki, şirkət ötən ilin eyni dövrünü 1,6 milyard yuan zərərlə başa vurmuşdu.

"CXMT"nin IPO-su bu il Çin kapital bazarında ən iri səhm yerləşdirmələrindən biri hesab olunur.

Tənzilə Ağabalayeva