Frilanserlər uğursuz əməkdaşlığı əvvəlcədən necə müəyyən edə bilər?

Frilanser fəaliyyəti yalnız yeni müştərilər qazanmaqdan ibarət deyil. Ən vacib bacarıqlardan biri də gələcəkdə problem yarada biləcək müştəriləri vaxtında tanımaqdır. Təcrübəli frilanser və strateq Stefan Palios bildirib ki, "qırmızı bayraqlar" (red flags) hər zaman əməkdaşlıqdan imtina etmək üçün səbəb olmasa da, onlara diqqət yetirmək vacibdir.

Valyuta.az xəbər verir ki, müəllif frilanserlərin ən çox rastlaşdığı təhlükə siqnallarını və onlarla necə davranmalı olduqlarını izah edib.

Müştəri daim qiyməti aşağı salmağa çalışır

Qiymətlə bağlı danışıqlar normaldır. Lakin müştəri bütün söhbəti yalnız endirim üzərində qurursa, bu, əməkdaşlığın problemli ola biləcəyini göstərir.

Belə hallarda söhbəti qiymətdən çox görüləcək işin nəticələrinə yönəltmək tövsiyə olunur. Əgər büdcə məhduddursa, xidmətin əhatə dairəsini azaltmaq daha doğru yanaşmadır.

Həddindən artıq mikroidarəetmə

Bəzi müştərilər layihənin ümumi məqsədlərindən çox, ən xırda detallara müdaxilə etməyə çalışırlar. Bu isə frilanserin işini çətinləşdirə və prosesi ləngidə bilər.

Belə vəziyyətdə müştəridən layihənin əsas məqsədini izah etməsini xahiş etmək və işi həmin məqsədə uyğun qurmaq daha effektiv hesab olunur.

Layihənin məqsədi aydın deyil

Bəzən müqavilə imzalandıqdan sonra məlum olur ki, müştəri görüləcək iş və gözlənilən nəticələr barədə dəqiq məlumat verməyib.

Bu halda müəllif "təsdiqlə və ya düzəlt" metodundan istifadə etməyi məsləhət görür. Frilanser layihə barədə öz anlayışını yazılı şəkildə təqdim etməli və müştəridən bunu təsdiqləməsini və ya düzəliş etməsini istəməlidir.

Müştəri öz öhdəliklərini yerinə yetirmir

Frilanserin işi çox vaxt müştərinin təqdim etməli olduğu məlumat və materiallardan asılı olur. Əgər müştəri öz hissəsini yerinə yetirmirsə, layihə dayanır və gəlir riski yaranır.

Belə hallarda qısa və konkret xatırlatma məktubu göndərmək tövsiyə edilir.

Şirkətin məqsədləri paylaşılmır

Layihənin hansı biznes məqsədinə xidmət etdiyini bilmədən keyfiyyətli nəticə əldə etmək çətindir.

Müştəri şirkətin məqsədlərini açıqlamaq istəmirsə və ya açıqlaya bilmirsə, bu, gələcəkdə əlavə problemlər, narazılıq və hətta ödənişlə bağlı mübahisələr yarada bilər.

Müştəri cavab vermir

Əməkdaşlığın əvvəlində və ya layihə zamanı uzun müddət cavab gəlməməsi ciddi xəbərdarlıq siqnalıdır.

Belə vəziyyətdə müəllif işi müvəqqəti dayandıraraq müştəriyə yazılı şəkildə məlumat verməyi tövsiyə edir. Əks halda frilanser razılaşdırılmamış iş gördüyünə görə sonradan problemlə üzləşə bilər.

Hər problemə görə frilanseri günahlandırır

Peşəkar frilanser səhvlərini qəbul edib düzəltməlidir. Lakin müştəri baş verən hər problemi frilanserin üzərinə atırsa, bu, sağlam əməkdaşlıq əlaməti deyil.

Belə hallarda bütün yazışmaların, görülən işlərin və razılaşmaların sənədləşdirilməsi vacibdir. Bu, həm mübahisələr zamanı, həm də ödəniş məsələlərində frilanseri qoruyur.

Şəxsi münasibətlərə keçir

İşgüzar münasibətlər heç vaxt şəxsi təhqir və ya kobud davranış səviyyəsinə keçməməlidir.

Müəllif hesab edir ki, hər kəsin pis günü ola bilər. Lakin bu davranış təkrarlanırsa, əvvəlcə xəbərdarlıq edilməli, davam edərsə əməkdaşlıq dayandırılmalıdır.

Sərvanə Rəmixanova