FED protokolları bazarlarda faiz artımı gözləntilərini gücləndirdi

ABŞ Federal Ehtiyat Sisteminin (FED) Federal Açıq Bazar Komitəsinin (FOMC) iyun iclasının çərşənbə günü dərc olunan protokolları göstərir ki, qurum daxilində fikir ayrılıqları olsa da, faiz dərəcələrinin 2027-ci ilin ikinci rübünədək azaldılması nəzərdə tutulmur.

Valyuta.az xəbər verir ki, yaxın Şərqdə gərginliyin yenidən artması bazarlarda sentyabr ayına qədər faiz artımı ehtimalını təxminən 70 faizə çatdırıb.

Protokollara əsasən, FOMC ötən ay yekdilliklə əsas faiz dərəcəsini 3,5–3,75 faiz intervalında saxlamaq qərarı verib.

İştirakçılar hesab edirlər ki, növbəti faiz endirimi yalnız 2027-ci ilin ikinci rübündə gündəmə gələ bilər.

ABŞ Prezidenti Donald Tramp çərşənbə günü İranla əldə olunmuş müvəqqəti sülh razılaşmasının artıq qüvvədə olmadığını bildirib. O, ABŞ-nin gecə saatlarında İrana yenidən zərbələr endirə biləcəyini istisna etməyərək, yeni razılaşmanın bağlanmasına da əmin olmadığını deyib.

Bu açıqlamalardan sonra beynəlxalq etalon neft markası olan "Brent Crude"ın qiyməti qısa müddət ərzində yenidən bir barel üçün 80 ABŞ dollarını ötüb.

Geosiyasi gərginlik fond bazarlarında da satış dalğasına səbəb olub. "Dow Jones Industrial Average" indeksi təxminən 570 bənd və ya 1 faiz geriləyib. "S&P 500" indeksi 0,3 faiz, "Nasdaq" isə 0,1 faiz dəyər itirib.

"CME Group"un "FedWatch" alətinin məlumatına görə, sentyabr ayına qədər FED-in faiz dərəcəsini artıracağına dair bazar ehtimalı əvvəlki günkü 62 faizdən 68,8 faizə yüksəlib. Dekabr ayı üçün bu göstərici 85,3 faiz səviyyəsində qiymətləndirilir.

Protokollarda qeyd olunur ki, FED rəsmilərindən bir neçəsi inflyasiya risklərini nəzərə alaraq faiz dərəcələrinin artırılmasının əsaslı ola biləcəyini düşünür. Bununla belə, onlar yekunda faizlərin dəyişdirilmədən saxlanılması qərarını dəstəkləyiblər.

Digər bəzi rəsmilər isə mövcud pul-kredit siyasətini həddindən artıq sərt hesab etsələr də, onlar da faiz dərəcələrinin sabit saxlanılmasına səs veriblər.

Sənəddə bildirilir ki, iclas iştirakçılarının əhəmiyyətli hissəsi ilin sonuna qədər faiz dərəcələrinin hazırkı səviyyədə və ya bir qədər aşağı olacağını gözləyir. Bununla yanaşı, digər qrup ilin sonunadək faiz dərəcələrinin daha yüksək olacağını proqnozlaşdırır.

FED son aylarda yüksək inflyasiyanın davam etməsini faiz siyasəti ilə bağlı əsas risklərdən biri kimi qiymətləndirir. İranla münaqişə fonunda enerji daşıyıcılarının bahalaşması istehlak qiymətlərinə də təsir göstərib.

FED-in üstünlük verdiyi inflyasiya göstəricisi olan əsas şəxsi istehlak xərcləri indeksi (Core PCE) may ayında illik ifadədə 3,4 faizə yüksələrək son üç ilin ən yüksək səviyyəsinə çatıb.

Əsas istehlak qiymətləri indeksi (Core CPI) isə illik 4,2 faiz artıb. Bu dövrdə benzin qiymətləri ötən ilin eyni ayı ilə müqayisədə 59 faiz bahalaşıb.

Tənzilə Ağabalayeva