Aİ 14 kriptovalyuta platformasına əməliyyat qadağası tətbiq edib

Avropa İttifaqı (Aİ) Rusiyanın Ukraynaya qarşı apardığı müharibə ilə əlaqədar qəbul etdiyi 21-ci sanksiyalar paketi çərçivəsində 14 kriptovalyuta platforması və əlaqəli qurumla Aİ-yə bağlı fiziki və hüquqi şəxslərin əməliyyat aparmasını qadağan edib.

Valyuta.az xəbər verir ki, bu barədə blokçeyn analitik şirkəti TRM Labs məlumat yayıb.

Sanksiya siyahısına "HTX", "EXMO", "Rapira", "Aifory Pro", "ABCeX", "WhiteBird", "NoOnecrypto", "Tradex", "Monease", "BitPapa", "Exnode/Exnode Pay", "A7 Nigeria", "A7 Africa" və "PilotFinance" platformaları daxil edilib.

Məlumata görə, sözügedən platformalar Gürcüstan, Panama, Birləşmiş Ərəb Əmirlikləri, Marşal adaları, Qırğızıstan və Belarus kimi ölkələrdə fəaliyyət göstərir. Aİ hesab edir ki, bu platformalar Rusiyaya qarşı tətbiq olunan sanksiyaların aşılmasını asanlaşdıran maliyyə və kripto infrastrukturunun bir hissəsidir.

Aİ-yə daha geniş qadağa səlahiyyəti verilib

Yeni sanksiyalar paketi yalnız konkret şirkətlərlə məhdudlaşmır. Qərara əsasən, Aİ Rusiyanın sanksiyalardan yayınmasına kömək edən platformalara ev sahibliyi edən üçüncü ölkələrə qarşı da daha geniş məhdudiyyətlər tətbiq edə biləcək.

Belə ki, zəruri hesab edilərsə, Aİ-də fəaliyyət göstərən qurumlarla müəyyən ölkədəki bütün kriptoxidmət təminatçıları arasında əməliyyatlar tamamilə qadağan oluna bilər.

Aİ Şurası bildirib ki, bu addım sanksiyaların pozulmasına şərait yaradan kripto infrastrukturuna ev sahibliyi edən ölkələr üçün ciddi çəkindirici mexanizm rolunu oynayacaq.

Son dörd ilin ən geniş sanksiya paketi

21-ci sanksiyalar paketi yalnız kriptovalyuta sektorunu əhatə etmir. Paket çərçivəsində ümumilikdə 218 fiziki və hüquqi şəxs sanksiya siyahısına əlavə olunub. Onlardan 48-i fiziki şəxs, 170-i isə şirkət və digər qurumlardır.

Bundan əlavə, 94 bank və iri maliyyə qurumunun aktivləri dondurulub, 33 Rusiya maliyyə təşkilatı ilə əməliyyatlara qadağa qoyulub. Həmçinin Rusiyanın sanksiyalardan yayınmaq üçün istifadə etdiyi iddia edilən A7 şəbəkəsi ilə əlaqəli daha dörd qurum da sanksiya siyahısına daxil edilib.

Yeni qərarlarla Aİ-nin Rusiyanın ənənəvi bank sisteminə alternativ kimi istifadə etdiyi iddia olunan kriptovalyuta infrastrukturu və sərhədlərarası maliyyə vasitəçilərinə təzyiqi daha da artırdığı qeyd olunur.

Sərvanə Rəmixanova