Ləğv olunan banklar üzrə 1,7 milyard manatdan çox kompensasiya ödənilib

Bu ilin iyulun 1-nə Azərbaycanda ləğv prosesində olan 19 bank üzrə 1 milyard 729 milyon 887 min 654,29 manat kompensasiya ödənilib.

Valyuta.az xəbər verir ki, bunu Əmanətlərin Sığortalanması Fondunun İctimaiyyətlə əlaqələr şöbəsinin nümayəndəsi Sevinc Səlimova Milli Mətbuat Günü münasibətilə təşkil olunmuş Dialoq və Əməkdaşlıq Forumunda deyib.

Onun sözlərinə görə, hesabat dövrünədək kompensasiya ödənilən əmanətçilərin sayı 63 888 nəfər olub.

S. Səlimova bildirib ki, hazırda aktiv banklarda fiziki şəxslərin əmanətlərinin 83%-i qorunan (14 milyard 735 milyon manat), 17%-i (3 milyard 15 milyon manat) isə qorunmayan əmanətlərdir.

Bununla yanaşı, hesabat dövründə qorunan əmanətlər üzrə cari dövr üçün illik maksimal faiz dərəcəsi milli valyutada yerləşdirilmiş əmanətlər üçün 12%, xarici valyutada yerləşdirilmiş əmanətlər üçün isə 2,5% təşkil edir.