Qollu yorğanı yaratdı, ideyası ilə dünyanı fəth etdi

Bəzən ən böyük biznes ideyaları mürəkkəb texnologiyadan deyil, gündəlik həyatda rast gəlinən sadə bir problemdən yaranır.

ABŞ-li Qeri Kleq (Gary Clegg) tələbə olarkən yorğanın üzərinə qol əlavə etmək ideyasını reallaşdırdı. Bu sadə yenilik sonradan milyonlarla insanın istifadə etdiyi məhsula çevrildi, ona dünya şöhrəti qazandırdı və həyatını tamamilə dəyişdi.

Sadə narahatlıq böyük ideyaya çevrildi

Valyuta.az xəbər verir ki, Qeri Kleq 1998-ci ildə kollec tələbəsi olarkən soyuq havalarda kitab oxuyarkən və ya televizora baxarkən əllərini yorğanın altından çıxarmağın narahat olduğunu hiss edib. Məhz bu problem onu yorğana qollar əlavə etmək ideyası üzərində düşünməyə vadar edib.

İlk nümunəni özü hazırlayan Kleq məhsulunu "Slanket" adlandırdı. Lakin ideyanın bazara çıxması üçün illər lazım oldu.

Qollu yorğan qlobal trendə çevrildi 

2007-ci ildə qardaşı Ceff Kleq ilə birlikdə "Slanket" şirkətini quran sahibkar məhsulu satışa çıxardı. Qollu yorğan qısa müddətdə böyük maraq gördü və televiziya alış-veriş platformalarında satış rekordları qırdı.

Məhsulun populyarlığı artdıqca bazarda "Snuggie", "Toasty Wrap" kimi oxşar məhsullar da satışa çıxarıldı. Bununla da qollu yorğan qlobal trendə çevrildi və dünyanın müxtəlif ölkələrində milyonlarla alıcı qazandı.

"Slanket" onun həyatını kökündən dəyişib

Qeri Kleq sonradan verdiyi müsahibələrdə bildirib ki, "Slanket" onun həyatını kökündən dəyişib. O, məhsulu sayəsində Yaponiya, Çin, Fransa, İtaliya, Böyük Britaniya və Almaniya da daxil olmaqla bir çox ölkəyə səyahət edib, televiziya proqramlarında iştirak edib və beynəlxalq biznes qurub.

Daim səyahət etməyi sevən sahibkar hətta Nyu-Yorkdakı mənzilini sataraq daimi səyyah həyatını seçib. Onun sözlərinə görə, məqsədi heç vaxt klassik ofis işində çalışmaq olmayıb.

Biznesdən xeyriyyəçiliyə üz tutdu

Uzun illər biznes uğurunun gətirdiyi imkanlardan yararlanan Kleq sonradan fəaliyyət istiqamətini dəyişərək humanitar layihələrə qoşulub.

O, Yunanıstanda qaçqın düşərgəsində aylarla könüllü fəaliyyət göstərib, daha sonra isə Afinada yaradılan təhsil mərkəzinin idarə heyətinə qoşularaq sosial layihələrdə iştirak etməyə başlayıb.

Kleq bildirib ki, insanlara kömək etmək biznes uğuru qədər ona mənəvi məmnunluq verir.

Özünü "ixtiraçı" adlandırmağı sevmir 

Maraqlıdır ki, milyonlarla satılan məhsulun müəllifi olmasına baxmayaraq, Qeri Kleq özünü "ixtiraçı" adlandırmağı sevmir.

Onun sözlərinə görə, əsl ixtiraçılar yüzlərlə patentə sahib olan insanlardır. O isə sadəcə yaxşı ideyası olan və həmin ideyanı həyata keçirən adi bir tələbə olduğunu düşünür.

Sadə ideya böyük uğurun simvoluna çevrildi

Qeri Kleqin hekayəsi göstərir ki, uğurlu biznes yaratmaq üçün hər zaman mürəkkəb texnologiya və böyük sərmayə tələb olunmur. Bəzən insanların gündəlik həyatını asanlaşdıran kiçik bir yenilik belə qlobal biznesə çevrilə bilər.

Bu gün qollu yorğan dünyanın ən tanınmış məişət məhsullarından biri hesab olunur və Qeri Kleqin adı sadə ideyanı uğurlu biznesə çevirən sahibkarlar sırasında çəkilir.

Rəfiqə Abdin