"Patreon" əməkdaşlarının 20%-ni ixtisar edir

Yaradıcı kontent istehsalçıları üçün üzvlük platforması olan "Patreon" əməkdaşlarının 20%-ni, yəni 93 nəfəri ixtisar edəcəyini açıqlayıb.

Valyuta.az xəbər verir ki, şirkətin baş icraçı direktoru Cek Konte əməkdaşlara göndərdiyi məktubda bildirib ki, əsas biznes güclü olsa da, bazardakı dəyişikliklərə uyğunlaşmaq və xərcləri optimallaşdırmaq üçün bu addım zəruridir.

Konte qeyd edib ki, süni intellekt texnologiyaları texnologiya sektorunu köklü şəkildə dəyişdirib. Bununla belə, o vurğulayıb ki, ixtisarların məqsədi işçiləri süni intellektlə əvəz etmək deyil.

Şirkət həmçinin təşkilati strukturunu yenidən quracağını, idarəetmə pillələrini azaldacağını və komandaları əsas prioritetlər ətrafında formalaşdıracağını bildirib.

İxtisar edilən əməkdaşlara ən azı 16 həftəlik kompensasiya, hər işlənmiş il üçün əlavə 1 həftəlik ödəniş, ilin sonunadək tibbi sığorta və şirkət noutbukunu əvəz etmək üçün 1 500 dollar məbləğində birdəfəlik yardım veriləcək.

Qeyd edək ki, bu, "Patreon"un 2022-ci ildən bəri həyata keçirdiyi ən böyük ixtisardır. Həmin vaxt şirkət işçi heyətinin 17%-ni ixtisar etmiş, Berlin və Dublin ofislərini də bağlayıb.

Sərvanə Rəmixanova