"Google" hesabımızı selfie video ilə bərpa etməyə imkan verəcək

"Google" hesabların bərpası prosesində istifadəçilərin şəxsiyyətini təsdiqləmək üçün selfie video əsasında yeni doğrulama üsulunu təqdim edib.

Valyuta.az xəbər verir ki, yeni funksiya mərhələli şəkildə istifadəyə verilir və xüsusilə istifadəçi parolunu unutduqda, etibarlı cihazına çıxışını itirdikdə və ya mövcud giriş üsullarından istifadə edə bilmədikdə əlavə təsdiqləmə vasitəsi kimi nəzərdə tutulub.

İstifadəçilər əvvəlcədən hesabın "Təhlükəsizlik və giriş" bölməsində qısa selfie videosu çəkəcəklər. Sonradan hesaba yenidən daxil olmaq lazım gəldikdə isə sistem istifadəçidən oxşar video çəkməsini istəyəcək və yeni görüntünü əvvəlki video ilə müqayisə edərək şəxsiyyəti təsdiqləyəcək.

"Google" bildirib ki, saxta foto, əvvəlcədən çəkilmiş video və deepfake texnologiyalarından istifadənin qarşısını almaq üçün canlılıq (liveness) yoxlamaları və əlavə təhlükəsizlik mexanizmləri tətbiq olunacaq.

Şirkətin məlumatına görə, selfie videoları şifrələnmiş formada saxlanılacaq, yalnız istifadəçinin razılığı ilə yaradılacaq və istənilən vaxt hesab ayarlarından silinə biləcək. Biometrik məlumatların istifadəçinin açıq razılığı olmadan başqa məqsədlər üçün istifadə edilməyəcəyi də vurğulanıb.

Yeni funksiya ilkin mərhələdə uyğun "Google" hesabları üçün mərhələli şəkildə istifadəyə veriləcək.

Sərvanə Rəmixanova