"Bitcoin" Təhlükəsizlik Birliyi yaradıldı

"BlackRock", "Coinbase", "Fidelity Digital Assets", "Strategy", "Blockstream" və digər aparıcı şirkətlər "Bitcoin" şəbəkəsinin uzunmüddətli təhlükəsizliyini gücləndirmək məqsədilə Bitcoin Təhlükəsizlik Konsorsiumu yaradıb.

Valyuta.az xəbər verir ki, konsorsium ( eyni məqsəd naminə bir neçə şirkətin, təşkilatın və ya qurumun bir araya gələrək əməkdaşlıq etdiyi birlikdir) üzvləri qarşıdakı üç il ərzində "Bitcoin"in təhlükəsizliyi üzərində çalışan tərtibatçı və tədqiqatçıların dəstəklənməsi üçün ümumilikdə 15 milyon dollar vəsait ayırmağı öhdələrinə götürüblər. Hər bir üzv maliyyənin hansı layihəyə yönəldiləcəyinə müstəqil qərar verəcək.

Konsorsiumun əsas məqsədlərindən biri "Bitcoin"in təhlükəsizliyi ilə bağlı etibarlı məlumatların ictimaiyyətə çatdırılmasıdır. Qeyd olunub ki, qurum "Bitcoin" protokolunun inkişafına müdaxilə etməyəcək və konkret dəyişiklikləri dəstəkləməyəcək.

Konsorsiumun ilk prioritet istiqaməti isə gələcəkdə kvant kompüterlərinin "Bitcoin"in kriptoqrafik sistemləri üçün yarada biləcəyi risklərə qarşı hazırlıq olacaq. Bildirilir ki, hazırda belə təhlükə yaradacaq gücdə kvant kompüterləri mövcud olmasa da, kvant sonrası kriptoqrafik müdafiə mexanizmlərinin hazırlanması uzunmüddətli prioritet hesab edilir.

Sərvanə Rəmixanova