Sığorta startapı 4 milyard dollar dəyərləmə ilə yeni investisiya cəlb edib

Süni intellekt əsaslı sığorta həlləri təqdim edən ABŞ-nin "Corgi" startapı 4 milyard dollar dəyərləmə ilə növbəti investisiya raundunu tamamlayıb.

Valyuta.az xəbər verir ki,  bu, şirkətin son 8 həftə ərzində keçirdiyi üçüncü investisiya raundudur. İnvestisiyanın həcmi açıqlanmasa da, raundun artıq başa çatdığı bildirilir. Şirkət məsələ ilə bağlı şərh verməkdən imtina edib.

"Y Combinator"un məzunu olan "Corgi" bu ilin yanvarında 108 milyon dollar, mayın əvvəlində isə 1,3 milyard dollar dəyərləmə ilə 160 milyon dollar investisiya cəlb edib. Cəmi üç həftə sonra şirkət 2,6 milyard dollar dəyərləmə ilə daha 106 milyon dollar topladığını açıqlayıb.

Mənbələrin bildirdiyinə görə, şirkətin dəyərinin qısa müddətdə sürətlə artmasının əsas səbəbi gəlirlərindəki yüksəlişdir. "Corgi" ilin əvvəlində illik hesabla 40 milyon dollarlıq gəlir əldə etdiyini açıqlayıb. İlin sonuna qədər isə bu göstəricinin 450 milyon dollara çatacağı gözlənilir.

Startap süni intellekt vasitəsilə sığorta qiymətləndirilməsi, sığorta təkliflərinin hazırlanması və zərər ödənişlərinin daha sürətli həyata keçirilməsi xidmətlərini təqdim edir. Bundan əlavə, şirkət son dövrlərdə məlumat otağı (data room) proqram təminatı və 24 saat fəaliyyət göstərən qəhvəxanalar da açaraq fəaliyyət sahəsini genişləndirib.

Sərvanə Rəmixanova