"Mobileye"nin baş direktoru şirkətin robotaksi və robot texnologiyalarına keçid dövründə vəzifəsindən ayrılacaq

“Mobileye” şirkətinin təsisçisi və baş direktoru Amnon Şaşua təxminən 30 illik rəhbərlikdən sonra baş direktor vəzifəsindən ayrılmağı planlaşdırır. Bu qərar şirkətin robotaksi və humanoid robotlar sahəsində fəaliyyətini fəal şəkildə genişləndirdiyi dövrə təsadüf edir.

Valyuta.az xəbər verir ki, tənzimləyici sənədə əsasən, “Mobileye” yeni baş direktor təyin olunana qədər Amnon Şaşua vəzifəsini icra etməyə davam edəcək.

“Mobileye” fəaliyyətinə İsraildəki İvrit Universitetində Amnon Şaşuanın elmi tədqiqatlarına əsaslanan kompüter görməsi çiplərinin hazırlanması ilə başlayıb. Şirkət sonradan avtomobillər üçün təhlükəsizlik və sürücüyə yardım sistemləri üzrə çiplərin aparıcı təchizatçılarından birinə çevrilib.

“Mobileye” İsrail tarixinin ən böyük ilkin kütləvi səhm təkliflərindən (IPO) birini həyata keçirib.

Şirkət 2017-ci ildə “Intel” tərəfindən 15,3 milyard ABŞ dollarına satın alınıb, daha sonra isə 2022-ci ildə yenidən birja şirkəti kimi fəaliyyətə başlayıb. Bununla belə, “Intel” hazırda da şirkətin ən böyük səhmdarı olaraq qalır.

Amnon Şaşuanın rəhbərliyi dövründə “Mobileye” yalnız avtomobil istehsalçılarına çip satmaqla kifayətlənməyərək, avtonom idarəetmə sistemlərini də inkişaf etdirməyə başlayıb. Şirkət hazırda bu sistemləri “Volkswagen” və onun “MOIA” törəmə şirkətinə təqdim edir.

Yanvar ayında “Mobileye” Amnon Şaşuanın təsis etdiyi humanoid robot texnologiyaları startapı “Mentee Robotics”i 900 milyon ABŞ dollarına satın alıb. Şaşua bu addımı robot texnologiyaları və avtomobil süni intellekti sahəsində biznesin növbəti inkişaf mərhələsi kimi qiymətləndirilən “Mobileye 3.0” strategiyasının tərkib hissəsi adlandırıb.

Şirkət iyun ayında həmçinin açıqlayıb ki, yalnız təchizatçı kimi fəaliyyət göstərməklə kifayətlənməyəcək və 2027-ci ildə ABŞ şəhərlərindən birində öz robotaksi xidmətini istifadəyə verməyi planlaşdırır.

Mayya Hüseynova