"OpenAI" "ChatGPT Health" funksiyasını ABŞ-da bütün yetkin istifadəçilər üçün istifadəyə verdi

"OpenAI" sağlamlıqla bağlı suallara daha dəqiq və fərdiləşdirilmiş cavablar təqdim etmək üçün hazırladığı "ChatGPT Health" funksiyasını ABŞ-da 18 yaşdan yuxarı bütün istifadəçilər üçün istifadəyə verib.

Valyuta.az xəbər verir ki, yeni funksiya ödənişsiz (Free), Go, Plus və Pro tariflərindən istifadə edən şəxslər üçün əlçatandır. İstifadəçilər "Apple Health", "MyFitnessPal", "Epic" və "Oracle Health" kimi platformalardakı sağlamlıq məlumatlarını "ChatGPT" ilə əlaqələndirərək fərdi məlumatlarına əsaslanan cavablar əldə edə biləcəklər.

Şirkətin açıqlamasına görə, istifadəçilər hər həftə "ChatGPT"yə təxminən 300 milyon sağlamlıqla bağlı sual ünvanlayır. "OpenAI" həmçinin bildirib ki, yeni təqdim olunan "GPT-5.6 Luna" modeli bu sahədə əvvəlki "GPT-5.5" modeli ilə müqayisədə daha yüksək nəticələr göstərir.

Bununla yanaşı, "OpenAI" vurğulayıb ki, "ChatGPT Health" peşəkar tibbi xidmətin əvəzi deyil. Şirkət istifadəçilərə diaqnoz və ya müalicə məqsədilə yalnız süni intellektin cavablarına etibar etməməyi, sağlamlıqla bağlı bütün vacib qərarları həkim məsləhəti əsasında verməyi tövsiyə edib.