Süni intellekt bazarı "Intel"in gəlirlərini artırdı 

ABŞ-ın çip istehsalçısı "Intel" süni intellekt texnologiyalarına artan tələbat fonunda rüblük gəlir və mənfəət proqnozlarını yüksəldib. Səhmləri birjadankənar ticarətdə 5,2% bahalaşıb.

Valyuta.az xəbər verir ki, "Intel" üçüncü rübdə gəlirinin 15,8-16,8 milyard dollar aralığında olacağını gözləyir. Bu göstərici analitiklərin 15,1 milyard dollarlıq orta proqnozunu üstələyir.

Həmçinin şirkət səhm üzrə tənzimlənmiş mənfəətin isə 38 sent olacağını açıqlayıb. Analitiklərin gözləntisi 27 sent təşkil edirdi.

Süni intellekt məlumat mərkəzlərinin sürətli genişlənməsi nəticəsində mərkəzi prosessorlara (CPU) tələbat artıb. Bu səbəbdən "Intel" yaxın illərdə investisiya həcmini artırmaq qərarına gəlib.

Şirkətin məlumat mərkəzi və süni intellekt bölməsinin gəliri də gözləntiləri üstələyib. Bölmə ikinci rübdə 6,26 milyard dollar gəlir əldə edib. Analitiklərin proqnozu isə 5,37 milyard dollar idi.

“İntel” son dövrlərdə süni intellekt çipləri bazarında "Nvidia" və "AMD" kimi rəqiblərlə mübarizəni gücləndirməyə çalışır. İnvestorlar xüsusilə "Intel"in məlumat mərkəzi və müqaviləli istehsal (foundry) bölmələrinin inkişafını izləyirlər.

Süni intellekt texnologiyalarına artan maraq digər çip istehsalçılarına da təsir edib. Birjadankənar ticarətdə "Arm Holdings"in səhmləri 2,6%, "AMD"nin səhmləri isə 1,2% bahalaşıb.

Qeyd edək ki, "Intel" dünyanın ən böyük yarımkeçirici istehsalçılarından biridir. Şirkət son illərdə süni intellekt çipləri bazarında "Nvidia"nın liderliyi ilə artan rəqabət şəraitində istehsal imkanlarını genişləndirməyə və texnoloji üstünlüyünü bərpa etməyə çalışır.

Rəfiqə Abdin