"Nvidia", "Microsoft" açıq mənbəli süni intellekt modellərinə dəstək çağırışı edib

"Microsoft", "Nvidia", "Meta Platforms", "IBM" və digər iri texnologiya şirkətləri açıq mənbəli süni intellekt (Sİ) modellərinə vaxtından əvvəl məhdudiyyətlərin tətbiq edilməməsinə çağırıb.

Valyuta.az xəbər verir ki, şirkətlər ABŞ qanunvericilərinə ünvanladıqları ictimai müraciətdə açıq mənbəli modellərin rəqabət və innovasiya üçün mühüm əhəmiyyət daşıdığını bildiriblər.

"X" platformasında yayımlanan və ondan çox şirkət və təşkilatın imzaladığı məktubda "Nvidia"nın baş icraçı direktoru Censen Huanq qanunvericiləri açıq modellərə qarşı "rəqabəti boğan və innovasiyanı xaricə yönəldən vaxtından əvvəl məhdudiyyətlərdən" çəkinməyə çağırıb.

Məktub açıq mənbəli modellərlə "OpenAI" və "Anthropic" kimi şirkətlərin nəzarətində olan qapalı mənbəli modellər ətrafında davam edən müzakirələr fonunda yayımlanıb. Bildirilir ki, son aylarda Silikon Vadisinin bir sıra biznes liderləri qapalı modellərin yüksək xərcləri və istifadəyə qoyulan məhdudiyyətlərlə bağlı narazılıqlarını ifadə ediblər.

"Microsoft" və "Palantir Technologies"in rəhbərləri hesab edirlər ki, müştərilərin öz məlumat mərkəzlərində işlədə biləcəyi açıq mənbəli modellər süni intellekt xərclərinin azaldılmasına kömək edə bilər.

Məktubda həmçinin qeyd olunur ki, yalnız qapalı modellərə etibar etmək təhlükəsizlik baxımından kifayət etmir. Şirkətlərin fikrincə, açıq çəkili (open-weight) modellər tədqiqatçılara və proqramçılara sistemlərin davranışını araşdırmağa, zəiflikləri aşkar etməyə və təhlükəsizlik mexanizmlərini təkmilləşdirməyə imkan verir.

Sənəddə texnologiya oğurluğu ilə bağlı narahatlıqların əsaslı olduğu qəbul edilsə də, bu problemlərin genişmiqyaslı məhdudiyyətlərlə deyil, məqsədyönlü hüquqi və kommersiya mexanizmləri vasitəsilə həll edilməsinin daha məqsədəuyğun olduğu vurğulanıb.

Qeyd edək ki, müzakirələr ABŞ-da süni intellektin tənzimlənməsi ilə bağlı debatların gücləndiyi bir dövrə təsadüf edir. ABŞ qanunvericiləri süni intellekt modelləri üçün məcburi "dayandırma mexanizmi" ("kill switch") nəzərdə tutan qanun layihəsini müzakirə edir. 

Rəfiqə Abdin