Sem Altmanın biometrik startapı “World” kriptoaktiv satışı ilə 52,5 milyon dollar cəlb edib

“OpenAI”nin həmtəsisçisi Sem Altmanın həmtəsis etdiyi onlayn identifikasiya startapı “World” strateji investorlar üçün təşkil etdiyi kriptoaktiv token satışı nəticəsində 52,5 milyon dollar vəsait cəlb edib.

Valyuta.az xəbər verir ki, investorlar “World”ün WLD tokeninin 12 aylıq lok-ap (satış məhdudiyyəti) proqramında iştirak ediblər.

Lok-ap müddəti investorların müəyyən edilmiş dövr ərzində tokenlərini satmasına və ya ticarət etməsinə imkan vermir. Şirkətin cümə günü yaydığı açıqlamada bildirilir ki, bir illik lok-ap müddəti investorların “World”ün uzunmüddətli inkişafına və faydalılığına sadiqliyini nümayiş etdirir.

Cəlb olunan vəsait “World” şəbəkəsinin genişlənməsini maliyyələşdirmək məqsədilə yaradılmış, Kayman adalarında qeydiyyatdan keçmiş “World Foundation” fonduna yönəldiləcək.

Satışın əsas alıcısı rəqəmsal aktivlərə yönəlmiş vençur kapitalı şirkəti “Pantera Capital” olub. Sövdələşmədə iştirak edən digər şirkətlər arasında “Eightco Holdings”, “Bain Capital Crypto”, “Susquehanna Crypto” və “Selini Capital” da yer alıb.

“World” layihəsi San-Fransiskoda yerləşən, baş icraçı direktor və həmtəsisçi Aleks Blaniya (Alex Blania) tərəfindən idarə olunan “Tools for Humanity” (“TFH”) startapı tərəfindən inkişaf etdirilir. Sem Altman da şirkətin həmtəsisçilərindəndir.

“World” onlayn identifikasiya sahəsində fəaliyyət göstərən qeyri-adi biznes modelinə malikdir və şirkətin “insan olduğunu təsdiqləmə” alətləri adlandırdığı xidmətlərə çıxış təqdim edir. Layihənin konsepsiyasına görə, botlar və süni intellekt internetdə yayılan məzmunun böyük hissəsini yaratdıqca, hesabın arxasında real insanın, yoxsa bot və ya süni intellekt agentinin dayandığını müəyyənləşdirmək daha da vacib olur.

Şirkətin əsas məqsədi “World ID” adlı anonim rəqəmsal identifikatorun geniş yayılmasına nail olmaqdır. Bu sistem konkret hesabın arxasında botun və ya süni intellekt agentinin deyil, real insanın olduğunu təsdiqləyir.

“World” sistemində ən yüksək təsdiqləmə səviyyəsi olan “World ID” əldə etmək üçün istifadəçilər gözlərini “Orb” adlı metal kürə vasitəsilə skan etdirməlidirlər. Bu cihaz istifadəçinin göz bəbəyinin biometrik məlumatlarını unikal kriptoqrafik identifikatora çevirir. “Orb” cihazları “World”ün ofislərində, eləcə də dünyanın müxtəlif ölkələrində tərəfdaş mağazalarda yerləşdirilib.

Layihə əvvəlcə “Worldcoin” adı altında, daha çox kriptovalyuta yönümlü təşəbbüs kimi fəaliyyətə başlayıb. Son token satışında istifadə olunan kriptoaktiv də bu adla təqdim olunub. İstifadəçilər tokeni “World” tətbiqi vasitəsilə saxlaya və alqı-satqı edə bilirlər. Tətbiq eyni zamanda qeyri-saxlayıcı rəqəmsal pul kisəsi funksiyasını yerinə yetirir. Sonradan şirkət kripto sənayesinə qarşı artan mənfi münasibət fonunda brend adını “World” olaraq dəyişib.

Aprel ayında layihə tətbiqin yeni versiyasını istifadəyə verib və “Tinder”, “Zoom” və “DocuSign” da daxil olmaqla bir sıra şirkətlərlə tərəfdaşlıq elan edib. Bununla belə, qlobal ambisiyalarına baxmayaraq, “World” fəaliyyətini genişləndirməkdə və istifadəçilərin layihəyə marağını artırmaqda çətinliklərlə üzləşir. İyun ayında isə “TFH” işçi ixtisarları həyata keçirib.

Maya Hüseynova