FED-in faiz qərarı bu həftə açıqlanacaq - Bazarlar Kevin Warşın mesajlarını gözləyir

ABŞ Mərkəzi Bankı (FED) bu həftə növbəti faiz qərarını açıqlayacaq. Bazar iştirakçıları tənzimləyicinin uçot dərəcəsini dəyişməz saxlayacağını gözləsələr də, gələcək pul-kredit siyasətinə dair veriləcək mesajlar əsas diqqət mərkəzində olacaq.

Valyuta.az xəbər verir ki, FED-in qərarı çərşənbə günü Bakı vaxtı ilə saat 21:00-da elan ediləcək. Yarım saat sonra isə FED sədri Kevin Warş mətbuat konfransında jurnalistlərin suallarını cavablandıracaq.

İyunda olduğu kimi, builki iclasda da faiz dərəcələrinin sabit saxlanılması əsas ssenari hesab olunur. Bununla belə, bazarlar hələ də təxminən 33% ehtimalla FED-in faiz dərəcəsini 25 baza bəndi artıracağını qiymətləndirir.

İyun ayında "Brent" markalı neftin qiymətinin 70 dollara qədər enməsi ABŞ-da inflyasiyanın da zəifləməsinə səbəb olub. Həmin ay enerji qiymətləri aylıq müqayisədə 5,7% azalıb, illik inflyasiya isə 3,5% səviyyəsində olmaqla gözləntilərdən aşağı açıqlanıb..

Bu göstəricilər FED-in yaxın müddətdə faiz artırmasına ehtiyac yaradan güclü inflyasiya təzyiqinin olmadığını göstərirdi.

Lakin sonradan geosiyasi gərginliyin yenidən artması və "Brent" neftinin qiymətinin 100 dollara yüksəlməsi bazarlardakı qeyri-müəyyənliyi artırıb. Analitiklər hesab edirlər ki, bu şəraitdə Kevin Warşın inflyasiya və faiz siyasəti ilə bağlı verəcəyi mesajlar bazarlar üçün həlledici əhəmiyyət daşıyacaq.

Warşın çıxışına xüsusi diqqət yetiriləcək

Jerom Pauelldən sonra FED-ə rəhbərlik edən Kevin Warş daha ehtiyatlı kommunikasiya tərzi ilə seçilir. O, adətən qısa açıqlamalar verir və gələcək siyasətlə bağlı konkret siqnallar səsləndirməkdən çəkinir.

Bu səbəbdən investorlar FED-in növbəti addımlarını proqnozlaşdırmaqda çətinlik çəkirlər və builki mətbuat konfransının bazarlara yeni istiqamət verəcəyi gözlənilir.

Bu həftə diqqət mərkəzində olacaq digər mühüm hadisə isə Yaponiya Mərkəzi Bankının (BoJ) faiz qərarıdır. Qurumun qərarı cümə günü açıqlanacaq və analitiklər BoJ-un da faiz dərəcələrini dəyişməyəcəyini proqnozlaşdırırlar.