"Bitwise" CIO-su: "Növbəti kripto yüksəlişi əvvəlkilərindən fərqli olacaq"

"Bitwise" şirkətinin investisiya direktoru (CIO) Mett Hauqan (Matt Hougan) hesab edir ki, "Bitcoin" bazarında dib səviyyəsinin formalaşmasının ilk əlamətləri görünməyə başlayıb.

Valyuta.az xəbər verir ki, onun fikrincə, növbəti "buğa bazarı" kriptovalyutalarla ənənəvi maliyyə sisteminin inteqrasiyası hesabına formalaşacaq.

Hauqan bildirib ki, "Bitcoin" iyulun 1-dən etibarən yüksəlir, spot "Bitcoin ETF"lərinə yenidən vəsait axını başlayıb və bazarda psixoloji vəziyyət tədricən yaxşılaşır:

"Geriləmənin tam başa çatdığını demək üçün hələ tezdir. Lakin hesab edirəm ki, Bitcoin artıq dib səviyyəsinə yaxınlaşıb", – deyə o bildirib.

Ekspertin sözlərinə görə, yeni yüksəliş dalğasının əsasını aktivlərin tokenləşdirilməsi, stablecoin-lərin geniş yayılması, maliyyə bazarlarının 24/7 fəaliyyətə keçməsi və institusional investorların "DeFi" ekosisteminə daxil olması təşkil edəcək.

Hauqan hesab edir ki, əvvəlki dövrlərdən fərqli olaraq, qarşıdakı "buğa bazarı" spekulyasiya deyil, real istifadə, real gəlir və qlobal maliyyə sektorundakı transformasiya hesabına formalaşacaq. Onun fikrincə, bu dəyişiklik hələ bazar qiymətlərində tam əksini tapmayıb.

Sərvanə Rəmixanova