"Az Sığorta"nın gəlirləri 25% azalıb, investisiya gəlirləri artıb

"Az Sığorta" ASC 2026-cı ilin birinci yarısı üzrə maliyyə nəticələrini açıqlayıb.

Valyuta.az xəbər verir ki, şirkətin 2026-cı ilin ilk yarısında gəlirləri 5 milyon 379 min 786 manat təşkil edib. Ötən ilin eyni dövründə bu göstəricinin 7 milyon 183 min 652 manat olduğunu nəzərə alsaq, bu, 1 milyon 803 min 866 manat və ya 25,11% azalma deməkdir.

Əsas əməliyyat gəlirləri 4 milyon 695 min 96 manatdan 3 milyon 769 min 305 manata enib. Beləliklə, bu istiqamətdə gəlirlər 925 min 792 manat və ya 19,72% azalıb.

Bildirilir ki, investisiya gəlirləri 1 milyon 127 min 11 manatdan 1 milyon 382 min 488 manata yüksələrək 255 min 477 manat və ya 22,67% artıb.

Hesabata əsasən, şirkətin xərcləri ötən ilin ilk yarısında 5 milyon 755 min 372 manat təşkil edib ki, bu da illik 6 milyon 341 min 670 manat ilə müqayisədə 586 min 298 manat və ya 9,24% azalma olduğunu deməyə əsas verir.

O cümlədən, əsas əməliyyat xərcləri 2 milyon 638 min 974 manatdan 1 milyon 986 min 764 manata enib. Beləliklə, bu istiqamətdə xərclər 652 min 211 manat və ya 24,72% azalıb.

Bununla yanaşı, "Az Sığorta" 2026-cı ilin ilk yarısını 375 min 586 manat xalis zərərlə başa vurub. Xatırladaq ki, 2025-ci ilin eyni dövründə şirkət 673 min 586 manat xalis mənfəət əldə edib. Beləliklə, şirkətin maliyyə nəticəsi 1 milyon 49 min 172 manat pisləşərək mənfəətdən zərərə keçib.

Şirkətin cəmi aktivləri bu ilin II rübündə 1 milyon 732 min 819 manat və ya 5,59% azalaraq 29 milyon 236 min 473 manat təşkil edib. 

Şirkətin cəmi öhdəlikləri isə 2026-cı ilin ilk yarısının sonuna 11 milyon 29 min 410 manat təşkil edib ki, bu da 2025-ci ilin eyni dövrü ilə müqayisədə 1 milyon 433 min 983 manat və ya 11,51% azalma deməkdir.

Sərvanə Rəmixanova