4 startap "Baku ID"də layihələrini investorlara təqdim etmək imkanı qazanıb

21 iyul tarixində "SABAH.lab" və dünyanın aparıcı biznes məktəblərindən biri olan "IE Business School"un birgə təşkilatçılığı ilə növbəti "Demo Day" tədbiri keçirilib. 

Valyuta.az xəbər verir ki, innovasiya və sahibkarlıq ekosisteminin aparıcı nümayəndələrini bir araya gətirən tədbirdə ümumilikdə 12 startap komandası texnoloji və biznes layihələrini auditoriyaya təqdim edib.

Tədbir çərçivəsində iştirakçı komandalar startap ideyalarını, biznes modellərini və gələcək inkişaf strategiyalarını vençur kapitalı fondlarının nümayəndələri, təcrübəli investorlar və sahə mütəxəssislərindən ibarət münsiflər heyətinə təqdim edib, daha sonra sual-cavab sessiyasında iştirak ediblər.

Startap təqdimatları regionun və yerli ekosistemin tanınmış investorları və sahibkarları tərəfindən yüksək qiymətləndirilib. Tədbirin münsiflər heyətində Məsud Əlisoy ("SABAH.fund"), Mənsur Paşayev ("Push30"), Hüseyn Məhmudov ("InMerge Ventures") və Mənsur Məmmədov ("Moonwake Investment") yer alıblar.

Münsiflər heyətinin qiymətləndirməsi və auditoriyanın birbaşa səsverməsi nəticəsində tədbirin ən perspektivli komandaları müəyyən olunub. Münsiflər heyətinin seçimi üzrə "SentryForge", "SmartFlow" və "Devlab" startapları qalib elan olunub. Auditoriya səsverməsinin qalibi isə "VestoAI" startapı olub.

Qalib gələn dörd komanda - "SentryForge", "SmartFlow", "Devlab" və "VestoAI" - regionun ən böyük innovasiya tədbirlərindən biri olan "Baku ID" çərçivəsində xüsusi stendlə çıxış etmək və layihələrini investorlara təqdim etmək imkanı qazanıb.

Bundan əlavə, "Demo Day"də təqdimatla çıxış edən bütün 12 komanda "Baku ID" tədbirinə giriş bileti əldə edib. Bu imkan startaplara qlobal investorlar, korporativ tərəfdaşlar və ekosistem liderləri ilə birbaşa şəbəkələşmək imkanı yaradır.

Qeyd edək ki, "SABAH.HUB" İnnovasiya Mərkəzinin nəzdində fəaliyyət göstərən "SABAH.lab" gənclərin inkişafını, sahibkarlığı və innovasiyaları dəstəkləyən akselerasiya proqramları həyata keçirir. Azərbaycan Respublikası Elm və Təhsil Nazirliyinin dəstəyi ilə yaradılan platforma "IE Business School" ilə strateji əməkdaşlıq çərçivəsində fəaliyyət göstərir və bu günədək yüzlərlə startapın formalaşmasına və inkişafına töhfə verib.

"Baku ID" haqqında

"Baku ID" "SABAH.HUB" İnnovasiya Mərkəzi tərəfindən təşkil olunan, startaplar və investisiyalara yönəlmiş, Azərbaycanın aparıcı innovasiya tədbirlərindən biridir.

Platformaların fəaliyyəti və son yeniliklər barədə daha ətraflı məlumatı "SABAH.HUB" və "Baku ID"nin rəsmi internet səhifələrindən əldə etmək mümkündür.