Çin çip nəhəngi IPO-da 9,8 milyard dollar topladı - 470 faiz bahalaşdı

Çinin aparıcı yaddaş çipi istehsalçılarından olan "ChangXin Memory Technologies" ("CXMT") şirkətinin səhmləri Şanxaydakı yüksək texnologiyalar bazarı olan "STAR Market"də ilk kütləvi təklif (IPO) zamanı 5,7 dəfə, yəni 470 faiz bahalaşıb. 

Valyuta.az xəbər verir ki, AFP agentliyinin məlumatına görə, şirkət səhmlərin yerləşdirilməsi nəticəsində materik Çini üçün rekord hesab olunan 66,6 milyard yuan (9,8 milyard ABŞ dolları) vəsait cəlb edib.

IPO-dan sonra "CXMT"nin bazar kapitallaşması 3,3 trilyon yuan (490 milyard ABŞ dolları) səviyyəsinə yüksəlib. Şirkət süni intellekt texnologiyaları sahəsində Cənubi Koreyanın "Samsung Electronics" və "SK Hynix", eləcə də ABŞ-ın "Micron" şirkətləri ilə rəqabət aparmağı hədəfləyir.

Agentliyin qeydinə görə, bundan əvvəl Çində ən böyük IPO uğuru 2020-ci ildə qeydə alınmışdı. Həmin vaxt "Semiconductor Manufacturing International Corp" ("SMIC") şirkəti 46,3 milyard yuandan çox vəsait cəlb etmişdi.

Süni intellekt texnologiyalarına artan maraq nəticəsində noutbuk, smartfon və digər elektron cihazlarda istifadə olunan nisbətən aşağı məhsuldarlıqlı "DRAM" yaddaş çiplərinə tələbat kəskin artıb. Bu isə bazarda çatışmazlıq yaradaraq qiymətlərin yüksəlməsinə səbəb olub. "AFP" bildirir ki, çip qıtlığı ilə üzləşən "Apple" şirkəti öz məhsullarında istifadə etmək məqsədilə "CXMT"nin istehsal etdiyi "DRAM" çiplərini sınaqdan keçirir.

2016-cı ildə təsis edilən "CXMT" hazırda qlobal "DRAM" bazarında təxminən 8 faiz payla dünyanın dördüncü ən böyük istehsalçısıdır. Şirkət ABŞ Müdafiə Nazirliyinin Çin müdafiə sənayesi ilə əlaqəli hesab etdiyi şirkətlər siyahısına daxil edilsə də, bu, Amerika şirkətlərinin onunla kommersiya əməkdaşlığı qurmasına mane olmur.

Paşa Məmmədli