Türk tankerinə dron zərbəsi: 140 min ton neft daşıyan gəmi vuruldu

ABŞ–İsrail və İran arasında davam edən müharibənin 27-ci günündə Türkiyə ilə bağlı insident qeydə alınıb. “Altura” adlı türk tankerinə dronun dəydiyi, gəminin zərbə nəticəsində su almağa başladığı bildirilir.

Valyuta.Az-ın Türkiyə mətbuatına istinadən verdiyi məlumata görə, 140 min ton neft daşıyan tanker İstanbul boğazına 26 kilometr məsafədə olarkən hadisə baş verib. Zərbədən sonra gəmi təcili yardım siqnalı göndərib.

Hadisə zamanı tankerdə olan 27 nəfərlik türk heyət üzvünün vəziyyətinin yaxşı olduğu açıqlanıb. Göyərtə və mühərrik bölməsində zədələr qeydə alınıb.

Təcili çağırışdan sonra Sahil Təhlükəsizliyi Baş İdarəsinin qüvvələri hadisə yerinə cəlb olunub. O cümlədən, qurumun tərkibində fəaliyyət göstərən “Nene Hatun” təcili müdaxilə gəmisi də əraziyə göndərilib.

Hazırda hadisənin hücum olub-olmaması ilə bağlı rəsmi açıqlama verilməyib.