Məzuniyyət haqqının hesablanması dəyişməyib: 2026-cı il ilə bağlı yayılan yanlış məlumatlara aydınlıq

Xəyyam Əsgərov

HR/İdarə etmə üzrə beynəlxalq standartlar üzrə ekspert 

Son günlər sosial şəbəkələrdə və müxtəlif bloq səhifələrində belə fikirlər səsləndirilir ki, guya 2026-cı ildən etibarən məzuniyyət haqqının hesablanması qaydası dəyişib və işçinin məzuniyyət dövründə aldığı məbləğ onun aylıq əmək haqqından az ola bilməz.
Bu iddia hüquqi baxımdan düzgün deyil.

Qanunvericilik nə deyir?

Əmək məzuniyyətinin hesablanması qaydası Azərbaycan Respublikasının Əmək Məcəlləsinin 139 və 140-cı maddələri, həmçinin Nazirlər Kabinetinin “Orta əmək haqqının hesablanması Qaydası” ilə tənzimlənir.
2026-cı ildə edilmiş dəyişikliklər məzuniyyət hüququnun təminatı ilə bağlı müəyyən məsələləri əhatə etsə də, məzuniyyət haqqının hesablanma mexanizmi dəyişdirilməmişdir.

Yəni, orta əmək haqqı əvvəl olduğu kimi son 12 ay üzrə faktiki işlənmiş günlər nəzərə alınmaqla hesablanır.

Əsas prinsip: Faktiki işlənmiş günlər

Məzuniyyət haqqı hesablanarkən, son 12 ayda əldə edilmiş əmək haqqı, həmin dövrdə faktiki işlənmiş iş günlərinin sayına bölünür, orta gündəlik əmək haqqı müəyyən edilir, məzuniyyət dövrünə düşən iş günlərinə vurulur.
Burada əsas meyar təqvim günləri deyil, faktiki işlənmiş günlərdir.

Sadə nümunə

Tutaq ki, işçi son 12 ayda 24 000 manat əmək haqqı alıb və həmin müddətdə 230 gün faktiki işləyib.
Orta gündəlik əmək haqqı:
24 000 / 230 = 104,35 manat
Əgər işçi 10 iş günü məzuniyyətə çıxırsa:
104,35 × 10 = 1 043,50 manat məzuniyyət haqqı ödənilir.
Bu məbləğin cari ay üzrə aylıq əmək haqqı ilə eyni olması qanuni tələb deyil. Hesablama orta əmək haqqı prinsipi ilə aparılır.

Nəyə diqqət edilməlidir?

HR və insan resursları mütəxəssisləri üçün əsas məsələ aylıq davamiyyət tabelinin düzgün aparılmasıdır. Xəstəlik, ödənişsiz məzuniyyət və digər fasilələr düzgün uçota alınmalıdır.
ERP sistemi olmayan şirkətlər üçün son 12 ay üzrə işlənmiş günlərin əl ilə hesablanması texniki səhvlərə səbəb ola bilər. ERP istifadə edən şirkətlər isə sistem parametrlərinin qanunvericiliyə uyğun qurulduğunu yoxlamalıdır.

2026-cı ildən etibarən məzuniyyət haqqının hesablanmasında fundamental dəyişiklik baş verməyib. Orta əmək haqqının hesablanması qaydası əvvəlki kimi qalır və faktiki işlənmiş günlər əsas götürülür.
Yanlış şərhlərə əsaslanaraq qərar vermək həm işçi, həm də işəgötürən üçün risk yarada bilər. Bu səbəbdən hesablamalar mütləq qanunvericiliyin tələblərinə uyğun aparılmalıdır.