Şahdağa gedən yolun üzərində 2,6 milyona torpaq satışa çıxarıldı

Qusar şəhərində biznes məqsədli istifadə üçün nəzərdə tutulan 260 sot torpaq sahəsi satışa çıxarılıb.

Valyuta.az xəbər verir ki, əmlakın satış qiyməti 2 milyon 600 min manat müəyyən edilib və satıcı barter (malın və ya əmlakın başqa mal və ya əmlakla dəyişdirilməsi) variantını da nəzərdən keçirməyə hazır olduğunu bildirib.

Elana əsasən, torpaq sahəsi Şahdağa gedən yolun Qusar çayının sol sahilində, dağ yamacında yerləşir. Bildirilir ki, ərazidən dağa, çaya və meşəyə açılan mənzərə var.

Qeyd olunur ki, torpaq sahəsi qaz, su, işıq, kanalizasiya və digər kommunal xətlərlə təmin olunub. Əmlakın çıxarışı (kupçası) mövcuddur və satışı müqavilə əsasında həyata keçirilir.

Sərvanə Rəmixanova