Cənubi Koreyanın K-beauty sənayesində son illərin ən diqqətçəkən adlarından biri Kim Byung Hoon hesab olunur. 36 yaşlı sahibkar hələ geniş ictimaiyyət üçün tanınmış sima olmasa da, qısa müddətdə ölkənin ən sürətlə böyüyən gözəllik şirkətlərindən birini qurmağı bacarıb.
Onun rəhbərlik etdiyi APR Corp 2014-cü ildə fəaliyyətə başlayıb. Şirkət əvvəlcə Aprilskin adı altında kosmetika brendi kimi yaradılsa da, sonradan sürətlə inkişaf edərək dəriyə qulluq məhsulları, qida əlavələri və xüsusilə gözəllik texnologiyaları sahəsində fəaliyyət göstərən böyük bir qrupa çevrilib.
Bu gün APR-in ən məşhur brendi Medicube hesab olunur. Ev şəraitində istifadə üçün hazırlanan AGE-R Booster və Booster Pro kimi üz baxımı cihazları sayəsində Medicube qlobal bazarda böyük populyarlıq qazanıb.
Mobil tətbiqlərdən biznesə
Kim Byung Hoonun sahibkarlıq yolu gözəllik sektorundan başlamayıb. O, Yonsei Universitetində biznes təhsili alarkən mübadilə proqramı ilə ABŞ-ın Kaliforniya ştatında oxuyub. Məhz həmin dövrdə mobil tətbiqlər hazırlamağa başlayıb və tanışlıq platforması da daxil olmaqla müxtəlif layihələr üzərində çalışıb.
Bu təcrübə ona istehlakçı davranışlarını rəqəmsal mühitdə analiz etməyi, məhsul hazırlama prosesini yaxından öyrənməyi və texnologiyaya əsaslanan brend quruculuğunun əhəmiyyətini anlamağa kömək edib.
Dəriyə qulluq bazarında fürsəti gördü
Seula qayıtdıqdan sonra Kim diqqətini gözəllik sektoruna yönəldib. O dövrdə Cənubi Koreyanın dəriyə qulluq bazarında çoxsaylı brendlər olsa da, onların əksəriyyətinin güclü rəqəmsal satış kanalları və birbaşa istehlakçıya satış modeli yox idi.
Kim və tərəfdaşı bu boşluğu görərək minimalist dizayna və gənc auditoriyaya hesablanmış Aprilskin brendini yaratdılar.
Məhsul hər şeydən önəmlidir
Şirkət birjada listinqə çıxsa da, Kim Byung Hoon məhsul hazırlanması prosesində aktiv iştirakını davam etdirir. O, yeni məhsulların hazırlanması, dizaynı və yaradıcı iclaslarda şəxsən iştirak etməsi ilə tanınır. Hətta gündəlik dəriyə qulluq rutinində APR-in istehsal etdiyi cihazlardan istifadə etdiyi bildirilir.
Medicube-un məşhur AGE-R Booster cihazı bazara çıxarılmazdan əvvəl onlarla dizayn və funksional dəyişiklikdən keçib.
Kim innovasiyanı kənar şirkətlərə həvalə etmək əvəzinə, APR daxilində öz elmi-tədqiqat və istehsal infrastrukturu yaradıb. Bu yanaşma şirkətə həm məhsulun keyfiyyətinə, həm də texnologiyanın inkişafına tam nəzarət imkanı verib.
Qlobal bazara yerli yanaşma
APR-in mərkəzi Seulda yerləşsə də, Kim şirkəti yarandığı gündən beynəlxalq bazar üçün formalaşdırıb.
Hazırda ABŞ şirkətin ən sürətlə böyüyən bazarı hesab olunur. APR burada logistika mərkəzləri yaradıb, Los-Ancelesdə pop-up mağazalar açıb. Brendin tanınmasına məşhurların da təsiri olub. Məsələn, Kylie Jenner-in Medicube mağazasında alış-veriş etdiyi görüntüləri sosial şəbəkələrdə geniş yayılıb.
Şirkət Yaponiya və Cənub-Şərqi Asiya ölkələrində də fəaliyyətini genişləndirib. Marketinq strategiyası isə hər bazarın xüsusiyyətlərinə uyğun qurulub. Taylandda əsas diqqət mikro-influenserlərlə əməkdaşlığa yönəldiyi halda, Yaponiyada klinik effektivlik və minimalist dizayn ön plana çıxarılıb.
Diqqət mərkəzindən uzaq rəhbər
Böyük uğurlarına baxmayaraq, Kim Byung Hoon şəxsi həyatını mediadan uzaq saxlamağa üstünlük verir və nadir hallarda müsahibə verir.
Son dövrlərdə onun adı Seulun Seongsu-dong bölgəsində təxminən 29 milyard von dəyərində penthaus alması ilə gündəmə gəlib. Bu alış kvadratmetr üzrə ölkə rekordlarından biri kimi qiymətləndirilib.
Kim Byung Hoon ilham mənbəyi kimi tez-tez Apple və Tesla şirkətlərini göstərir. Onun fikrincə, bu şirkətlərin əsas üstünlüyü yalnız məhsul istehsal etmək deyil, istifadəçilərin uzunmüddətli sadiqliyini təmin edən bütöv ekosistem yaratmaq bacarığıdır.
Şəbnəm İbrahimxəlilova
