Nyu-York məktəblərində ilk dəfə humanoid robot dərs deyəcək

ABŞ-nin ən böyük məktəb dairələrindən biri olan Nyu-York şəhərində ilk dəfə tədris prosesinə humanoid robot cəlb olunacaq.

Bu barədə "Trending Politics" platformasının həmtəsisçisi Kollin Raq "X" sosial şəbəkəsində paylaşım edib.

Məlumata görə, "Salli" adlı humanoid robot Nyu-York ştatının Salamanca şəhərində yerləşən orta məktəbdə 11-ci və 12-ci sinif şagirdlərinə dərs keçəcək. Robot Qərbi Nyu-York aksenti ilə danışacaq.

Bildirilir ki, "Salli" insan görünüşünə mümkün qədər yaxın şəkildə hazırlanıb. O, qollarını və ayaqlarını hərəkət etdirə bilsə də, sinif otağında sərbəst hərəkət edə bilmir.

Robot identifikasiya sistemi ilə təchiz olunub. Bu sistem vasitəsilə şagirdlər platformaya qoşularaq Sallinin onları tanımasını təmin edə biləcəklər.

Məlumata əsasən, humanoid robotun qiyməti 57 min ABŞ dollarıdır. Bu məbləğ Nyu-York ştatında müəllimlərin orta illik əməkhaqqından aşağıdır.

Bununla belə, məktəb rəhbərliyi robotun heç vaxt insan müəllimləri əvəz etməyəcəyini xüsusi vurğulayıb.

©Oxu.az