"Samsung" robototexnika bölməsi yaradır 

"Samsung Electronics" robototexnika sahəsində fəaliyyətini genişləndirmək məqsədilə baş icraçı direktoruna birbaşa tabe olacaq yeni robototexnika bölməsi yaradıb.

Valyuta.az xəbər verir ki, yeni yaradılan RX ("Robotics eXperience") bölməsi robototexnika üzrə orta və uzunmüddətli strategiyanın hazırlanmasına, əsas texnologiyaların inkişafına və bu sahədə biznes fəaliyyətinin idarə olunmasına cavabdeh olacaq.

Bölməyə şirkətin icraçı vitse-prezidenti Li Donqkun rəhbərlik edəcək. O, bundan əvvəl "Hyundai Motor Group"da robototexnika strategiyasına, o cümlədən "Boston Dynamics"in inkişaf istiqamətlərinə rəhbərlik edib.

"Samsung" həmçinin ABŞ, Çin və Yaponiyada robototexnika üzrə tədqiqat mərkəzləri yaradacağını açıqlayıb. Şirkət bu ölkələrdəki yerli ekosistemlərdən və mütəxəssis potensialından istifadə etməklə qlobal rəqabət qabiliyyətini artırmağı planlaşdırır.

Məlumata görə, yeni bölmənin yaradılması robototexnika sahəsində inkişafın və texnologiyaların kommersiyalaşdırılmasının sürətləndirilməsinə xidmət edəcək.

"Samsung" hesab edir ki, fiziki süni intellekt (Physical AI) texnologiyalarındakı sürətli inkişaf robototexnika bazarının perspektivini daha da artırır. 

Qeyd edək ki, şirkət ilk mərhələdə istehsal müəssisələrində istifadə olunacaq, daha sonra isə ev və pərakəndə satış sektoruna tətbiq ediləcək humanoid robotlar hazırlamağı planlaşdırır. Bu robotların əsas məqsədi məhsuldarlığı artırmaq və istifadəçi təcrübəsini yaxşılaşdırmaqdır.

Rəfiqə Abdin