Dünyanın ən bahalı suşisini harada yemək olar?

Yapon mətbəxinin ən məşhur yeməklərindən biri olan suşi tərkibindən və hazırlanma üsulundan asılı olaraq müxtəlif qiymətlərə satılır. Lakin Yaponiyanın Osaka şəhərində fəaliyyət göstərən bir restoran bu sahədə yeni rekorda imza atıb.

Valyuta.az xəbər verir ki, Guinness Dünya Rekordları Osaka şəhərində yerləşən "Sushi Kirimon" restoranının təqdim etdiyi "Kiwami Omakase" menyusunu dünyanın ən bahalı suşisi kimi qeydə alıb.

Menyunun qiyməti 350 min yapon yeni (təxminən 2 400 ABŞ dolları) təşkil edir. Bu da təqdim olunan suşinin 4080 manat  qiyməti olduğunu deməyə əsas verir.

"Kiwami Omakase" ümumilikdə 20 fərqli suşi növündən ibarətdir.

Bu rekord daha əvvəl filippinli aşpaz Angelito Araneta Jr.-a məxsus idi. O, 2010-cu ildə 24 karatlıq qızıl yarpaqla örtülmüş və brilyantlarla bəzədilmiş beş ədəd nigiri hazırlayıb.

Qiyməti niyə bu qədər yüksəkdir?

Guinness Dünya Rekordlarının məlumatına görə, "Kiwami Omakase" yalnız Yaponiyanın müxtəlif bölgələrindən xüsusi seçilmiş məhsullarla hazırlanır. Menyu ənənəvi yapon mətbəxinin (Washoku) hazırlanma üsullarına sadiq qalınaraq hazırlanır.

Menyuda nələr var?

"Kiwami Omakase" əsasən nigiri növlərindən ibarətdir. Bundan əlavə, menyuda saşimi və maki də yer alır.

İstifadə olunan məhsullar arasında ağ kirəmit balığı (White Tilefish), Beluga kürüsü, körpə siyənək (Shinko), Sakit okean göyüzgəc tunası (Pacific Bluefin Tuna), qızılbalıq, rif kalmarı, balina quyruğu əti, iki növ dəniz kirpisi (Uni), buxarda bişirilmiş abalona, futomaki, karides pastası (Oboro), müxtəlif hissələrdən hazırlanmış tuna nigiriləri, yapon pələng kreveti, düymə kreveti, dəniz ilanbalığı, qara trüfel və tüklü krab daxildir.

Menyudakı bütün suşi növlərinin üzəri son toxunuş kimi qızıl yarpaq ilə bəzədilir.

Xüsusi düyü və sirkədən istifadə olunur

Restoranın hazırladığı suşidə istifadə edilən düyü Yaponiyanın Akita və Yamaqata prefekturalarında yetişdirilən xüsusi düyü sortlarının qarışığından hazırlanır. Düyüyə əlavə olunan suşi sirkəsi isə Tokio və Çiba prefekturalarında uzun müddət saxlanılmış sirkələrin xüsusi qarışığından əldə edilir.

Beləliklə, nadir məhsullar, ənənəvi hazırlanma üsulu və yüksək keyfiyyətli inqrediyentlər "Kiwami Omakase"ni dünyanın ən bahalı suşi menyusuna çevirib.

Sərvanə Rəmixanova