Redaktor
İllik 250 min dollarlıq maaşı geridə qoydu, matcha kafesi açdı: "İndi daha xoşbəxtəm"
Yüksək maaşlı işdən imtina edib öz biznesini qurmaq bir çox insan üçün riskli qərar hesab olunur. Lakin ABŞ-da yaşayan proqram mühəndisi Mişel Yunq (Michelle Yeung) üçün bu addım həyatını tamamilə dəyişib.
2024-cü ilin yayında Manhettendə keyfiyyətli matcha kafelərinin az olduğunu görən Yunq bu sahədə biznes qurmaq qərarına gəlib. Lakin yüksək maaşlı işini plansız tərk etmək əvəzinə, aylarla hazırlıq aparıb.
Bu müddətdə o, səhər saat 05:00-dan etibarən Starbucks-da işləyərək kafe biznesinin incəliklərini öyrənib. Daha sonra proqram mühəndisi kimi əsas işinə qayıdıb. Bundan əlavə, matchanın hazırlanması və təqdimatı ilə yaxından tanış olmaq üçün Yaponiyaya səfər edib, müxtəlif üsulları araşdırıb və dostlarının iştirakı ilə məhsul sınaqları keçirib.
Biznesə başlamazdan əvvəl uyğun məkan tapmaq da asan olmayıb. İlk dəfə sahibkarlıq fəaliyyəti ilə məşğul olacağı üçün bir çox obyekt sahibi ona icarə vermək istəməyib. Nəhayət, Manhettenin Lower East Side bölgəsində kiçik bir məkan taparaq layihəsini həyata keçirməyə başlayıb.
2025-ci ilin martına qədər 200 min dollardan çox vəsait toplayan Yunq proqram mühəndisliyi sahəsindəki işindən ayrılıb. Bununla belə, hazırlıqlara baxmayaraq açılış ərəfəsində bir sıra problemlərlə üzləşib. Podratçıların işləri gecikdirməsi və açılışdan bir gün əvvəl kafeni su basması son anda əlavə çətinliklər yaradıb. O bildirir ki, dostlarının köməyi olmasaydı, kafeni vaxtında açmaq mümkün olmazdı.
Matcha House kafesi 2025-ci ilin iyulunda fəaliyyətə başlayıb. İlk aylarda Yunq gündə 12 saata qədər işləyib və hazırlanan bütün içkiləri şəxsən özü hazırlayıb. Hazırda isə kafedə təxminən 10 yarımştat əməkdaş çalışır və o, gündəlik əməliyyatların böyük hissəsini komandasına həvalə edib.
Yunqun sözlərinə görə, Starbucks-da qazandığı qısa müddətli təcrübə kafe biznesini idarə etməsi üçün mühüm rol oynayıb.
Hazırda Matcha House ilk fəaliyyət ilində mənfəət əldə etməyə yaxındır və ilkin investisiyaların geri qaytarılması prosesi davam edir. Yunq 2026-cı ildə özünə təxminən 33 min dollar maaş ödəməyi, gəlirin böyük hissəsini isə biznesin inkişafına yönəltməyi planlaşdırır. O, şəxsi xərclərinin ayda 2 500 dollardan az olduğunu bildirir.
"Mənim üçün artıq əsas məsələ nə qədər pul qazandığım deyil. Əsas olan hər gün nə işlə məşğul olduğumdur. Bir ili uğurla geridə qoyduğumuz üçün minnətdaram və biznesimizin daha uzun illər fəaliyyət göstərəcəyinə inanıram", – deyə Mişel Yunq bildirib.
Şəbnəm İbrahimxəlilova
