"The Odyssey" dünya üzrə 264 milyon dollar topladı

Rejissor Kristofer Nolanın yeni filmi "The Odyssey" nümayişinin ilk həftəsonunda dünya üzrə 264 milyon dollardan çox gəlir əldə edərək ilin ən uğurlu açılışlarından birinə imza atıb.

Valyuta.az xəbər verir ki, film ABŞ-da 125 milyon dollar, beynəlxalq bazarlarda isə 139 milyon dollardan çox gəlir toplayıb. Beləliklə, ekran əsəri təxminən 250 milyon dollarlıq istehsal büdcəsini ilk həftəsonunda geri qaytarmağı bacarıb.

Tənqidçilər və tamaşaçılar tərəfindən yüksək qiymətləndirilən film "A" CinemaScore reytinqi alıb və Batman seriyası istisna olmaqla, Kristofer Nolanın karyerasındakı ən uğurlu açılış filmi olub.

Bu uğur Kristofer Nolanın əvvəlki filmi olan və təxminən 1 milyard dollar gəlir gətirən "Oppenheimer"dən sonra rejissorun uğurlu seriyasını davam etdirdiyini göstərir. 

Müəllif hesab edir ki, filmin uğuru sosial şəbəkələrdə aparılan boykot çağırışlarının real kassaya ciddi təsir göstərmədiyini də nümayiş etdirib. Filmdə qaradərili aktrisa və trans aktyorun rol almasına görə sosial mediada tənqidlər səslənsə də, bu kampaniyalar tamaşaçı marağını azaltmayıb.

Məqalədə həmçinin vurğulanır ki, "The Odyssey"nin uğuru uzun illərdir səsləndirilən "Go woke, go broke" ("Həddindən artıq "woke" olsan, uğursuzluğa düçar olarsan") iddiasını da sual altına alır. Müəllif bildirir ki, "Ghostbusters", "The Little Mermaid" və "Elio" kimi filmlərin zəif nəticələri siyasi və ya sosial mesajlardan deyil, daha çox keyfiyyət problemlərindən qaynaqlanır. Eyni zamanda "Black Panther", "Barbie", "Wicked" kimi filmlər mütərəqqi mövzulara toxunsalar da, böyük kommersiya uğuru qazanıblar.

Sərvanə Rəmixanova