"Bolt" rəsmisi: "Sürücülər yüksək reytinq qazanmaq üçün sərnişinlərlə daha az danışırlar"

Fikir vermisinizsə, son dövrlər “Bolt” taksi şirkətinin sürücüləri artıq müştəri ilə ünsiyyəti azaldıb. Əksər “Bolt” sürücüləri yalnız zəruri hallarda danışır, digər hallarda isə səfəri sükut içində keçirməyə üstünlük verirlər. Bu dəyişiklik nə ilə bağlıdır? Taksi platformasının sürücülərlə ünsiyyətə dair müəyyən tələbləri varmı?

“Bolt”un Azərbaycan üzrə rəhbəri İlkin Zeynallı Valyuta.az-a bildirib ki, şirkət tərəfindən sürücülərə sərnişinlərlə ünsiyyət qurmamağa dair hər hansı xüsusi göstəriş və ya qadağa tətbiq edilmir. Onun sözlərinə görə, bazar bu prosesi müəyyən mənada özü tənzimləyir:

“Sürücülərin davranışları onların reytinqinə birbaşa təsir göstərir. Reytinq isə sürücünün bu və ya digər kateqoriyada fəaliyyət göstərib-göstərə bilməyəcəyini müəyyən edir. Buna görə də sürücülər xidmət səviyyəsini yüksəltməyə çalışırlar ki, “Comfort”, “Business” və digər kateqoriyalarda fəaliyyətlərini davam etdirə bilsinlər. Hətta 2 həftə əvvəl "Comfort" və "Business" kateqoriyalarında fəaliyyət göstərmək üçün tətbiq olunan tələblər daha da sərtləşdirilib. Artıq bu kateqoriyalarda minimal fəaliyyət tələbləri sırasında avtomobil modelindən əlavə sürücü reytinqi də əsas meyarlardan biridir. Sürücü reytinqinin minimal həddini 4,7-dən 4,85-ə qaldırmışıq. Bu da sürücülərin daha çox 4 və 5 ulduzlu qiymətləndirmə almağa çalışmasına səbəb olur. Yüksək reytinq qazanmaq üçün onlar sərnişinlərə mümkün qədər rahat səfər təqdim etməyə çalışırlar. Təcrübə göstərir ki, bir çox sərnişin üçün ən rahat səfər sakit keçən səfərdir və sürücülər də artıq bunu anlayırlar. Son dövrlər sürücülərin daha az danışmasının əsas səbəbinin onların sadəcə daha yaxşı xidmət nümayiş etdirmək məqsədilə ünsiyyəti yalnız zəruri hallarda başlatmaları olduğunu ehtimal edirəm”.

“Bolt” nümayəndəsinin sözlərinə görə, sürücülərə sərnişinlə ünsiyyət qurmağın qadağan olunduğu bildirilməsə də, xidmətin keyfiyyətini artıran zəruri ünsiyyət hər zaman təşviq edilir: "Təlimlərdə gedilən ünvanla bağlı dəqiqləşdirici sualların verilməsi, salondakı temperatur, musiqi və sərnişinin rahatlığını təmin edəcək digər məsələlərlə bağlı ünsiyyət üçün hər hansı məhdudiyyət yoxdur".

İ.Zeynallı bildirib ki, təlimlər zamanı sürücülərə daha çox etik davranış qaydaları izah olunur və sərnişinin şəxsi məkanına hörmət etmələri tövsiyə edilir.

"Biz sürücülərimizə tövsiyə edirik ki, insanların inanclarına, şəxsi baxışlarına və fərdi seçimlərinə təsir göstərə biləcək mövzulardan uzaq dursunlar. Sərnişinin rahat gedişinə mane ola biləcək hər hansı söhbət və ya davranışdan çəkinmək lazımdır. Bu, sürücü davranış qaydalarında da öz əksini tapır. Etik davranış qaydalarında qeyd olunur ki, zərurət yaranmadıqca ünsiyyətə başlamaq arzuolunan deyil".

Onun sözlərinə görə, bu yanaşma Azərbaycanda taksi xidmətlərinin keyfiyyətinin yüksəlməsinə də müsbət təsir göstərir:

"Tətbiq olunan təlimlər, sertifikatlaşdırma prosesi və fəaliyyəti davam etdirmək üçün tələb olunan lisenziyalar məhz bu məqsədə xidmət edir. Biz də “Bolt” olaraq gələcəkdə sürücülərimiz üçün daha geniş təlimlər keçirməyi və bunu davamlı ənənəyə çevirməyi planlaşdırırıq".

Sərvanə Rəmixanova